Мэкъуогъум и 12-р — Урысыем и Маф. Мы мэфэкIыр лъэпкъ зыкIыныгъэм итамыгъ, ти Хэгъэгу инепэкIэ, икъэкIощт уахътэкIэ пшъэдэкIыжьэу цIыфым ыхьырэр зэхишIэным фэIорышIэ. Зыфэдэ къэмыхъугъэ кIэн ыкIи лIэшIэгъухэм къапхырыкIыгъэ тарихъ зиIэ къэралыгъошхом ыцIэ мы мафэм аIэты. Ишъхьафитыныгъэ къыгъэнэным ар пчъагъэрэ фэбэнагъ. Урысыер зыкIыныгъэр зыщыпытэу, зэхэт къэралыгъошхоу зэрэщытыр зэрэдунаеу шыхьат афишIыгъ.

Мы мэфэкIым имэхьанэ къызэрагурыIорэм, еплъыкIэу фыряIэм зыщыдгъэгъуазэмэ тшIоигъоу нэбгырэ заулэмэ гущыIэгъу тафэхъугъ.

МэщлIэкъо Римм, Мыекъопэ гурыт еджапIэу N 2-м икIэлэегъадж:

— Урысыем и Мафэ — анахь къэралыгъо иным ыкIи лъэшым имэфэкI. Тикъэралыгъо культурнэ кIэнышхо, анахь чIыгу ыкIи чIыопс къэкIопIэ байхэр иIэу щыт. Сыд фэдэрэ зао зызэпечи, илъэшыгъэ къызэтыригъэнэн ылъэкIыгъ. Ащ итарихъ нэкIубгъохэр, ыпшъэкIэ къэспчъыгъэхэр тиеджакIохэм зэралъыдгъэIэсыщтхэм ыуж тит. Къэралыгъом ибыракъ, игимн, игерб якъэбархэр къафэтэIуатэ. МэфэкI Iофтхьабзэхэм тигурыт еджапIэ илъэс къэс чанэу ахэлажьэ. Мыгъэ Iофхэм язытет ар къыддимыгъэхъугъэми, къэкIощт илъэсым нахьышIум тыщыгугъыщт.

Уджыхъу Нэфсэт, Адыгэ къэралыгъо университетым иIофышI:

— Урысыем и Мафэ — цIыфхэр зэфэзыщэхэрэ мэфэкI. Тикъэралыгъо дунаим чIыпIэу щиубытырэр ащ тыгу къегъэкIыжьы. Ащ дакIоу, мэкъуогъу мэфэ фабэм тыгукIэ къытпэблэгъэ цIыфхэм таIукIэныр тиушъхьагъу. Зэныбджэгъухэм тызэхэтэу хагъэунэфыкIырэ Iофтхьабзэхэм илъэс къэс тахэлажьэ, ау мыгъэ коронавирусым ыпкъ къикIыкIэ зэхахьэхэр щагъэзыягъэх.

Светлана С., унэе предприниматель, мыгъомылэпхъэ товархэр ещэх:

— Сэ сшъхьэкIэ мы мафэм зысымыгъэпсэфэу Iоф сэшIэ. МэфэкI мафэхэм япхыгъэ товархэр сэщэх, арышъ, илъэс къэс сэлъэгъу ны-тыхэм ясабыйхэм Урысыем ибыракъ цIыкIухэр афащэфыхэу, ашъхьэ Iэтыгъэу, чэфхэу урамым зэрэрыкIохэрэр. Ащ сегъэгушхо. ЦIыфым ицIыкIугъом къыщегъэжьагъэу ихэгъэгу итарихъ ебгъэшIэнэу щыт.

Iэшъынэ Сусан.