Республикэм щыпсэурэ урымхэм яобщественнэ организациеу «АРГО-м», Адыгеим иобщественнэ организациеу «Мамырныгъэм и Лигэ» япащэу, спортымкIэ дунэе класс зиIэ мастерэу Аристотель Спировым гущыIэгъу тыфэхъугъ.

— Конституцием зэхъокIыныгъэу фашIыщтхэр лэжьэкIо къызэрыкIохэм ящыIэкIэ-псэукIэ нахьышIу шIыгъэным фытегъэпсыхьэгъэнхэ фае. ПкIэ лъамытэу гъэсэныгъэ зэрагъэгъотыным, медицинэм епхыгъэ фэIо-фашIэхэр гъэцэкIэгъэнхэм яхьылIэгъэ Iофыгъохэр хэушъхьафыкIыгъэхэу Конституцием хатхэнхэу тыкIэлъэIу, — къытиIуагъ А.С. Спировым.

Бразилием, Кубэ, Испанием, Италием, Швейцарием, Болгарием, нэмыкI хэгъэгухэм сащыIагъ. ТичIыгу ибаиныгъэхэм, тичIыопс идэхагъэ къяхъуапсэхэзэ, къэбар гъэшIэгъонхэр къафэтIуатэщтыгъэх. ТичIыгухэр IэкIыб къэралыгъохэм арамыщэнхэу, арамыхъожьынхэу, бэджэндэу арамытынхэу Конституцием итхэгъэнхэ фае.

Мамыр щыIакIэр къэухъумэгъэнымкIэ, зекIохэр ыкIи спорт зэнэкъокъухэр зэхэщэгъэнхэмкIэ общественнэ организациехэм ямэхьанэ къэIэтыгъэнымкIэ хэбзэ унашъохэр нахь игъэкIотыгъэу Конституцием хэмытхэ хъущтэп.

Хэгъэгум щыпсэурэ лъэпкъхэм языкIыныгъэ гъэпытэгъэным хабзэм икъулыкъушIэхэмрэ общественнэ организациехэмрэ зэгъусэхэу Iофхэр агъэцэкIэнхэр япшъэрылъ инэу зэрэщытыр Конституцием къыщытымыIо хъущтэп.

ДэгущыIагъэр

ЕмтIылъ Нурбый.