Жьыбгъэм ыкIуачIэкIэ электричествэ къэзытырэ станцие Адыгеим зэрэщагъэуцурэ проектым изы едзыгъошхо аухыгъ. «Россети ФСК ЕЭС» зыфиIорэм мы станциер ЗэикI электрическэ сетим пигъэнагъ.

Адыгэ ветроэлектростанцием кIуачIэ зэретыгъэщт схемэр гъэпсыгъэным пае километрэ 16,5-рэ хъоу электричествэм икIуапIэхэр ашIыгъэх, подстанциитIу агъэкIэжьыгъ, Урысыем къыщашIыгъэу лъэхъаным диштэрэ оборудование агъэуцугъ.

Шъугу къэдгъэкIыжьын, жьыбгъэм ыкIуачIэкIэ электричествэ къэзытырэ станциер Адыгеим щызгъэуцугъэр къэралыгъо корпорациеу «Росатомым» идивизионэу ветроэнергетикэм ылъэныкъокIэ проектхэм япхырыщын фэгъэзэгъэ АО-у «НоваВинд» зыфиIорэр ары. Шэуджэн ыкIи Джэджэ районхэм ягъунапкъэ ар щашIыгъ. Станцием жьыбгъэм ыкIуачIэкIэ электричествэ къэзытырэ пкъэу 60 хэхьэ. Пкъэу пэпчъ мегаватти 2,5-рэ къеты. Электроэнергиер трансформаторнэ подстанцие 55-мэ къякIолIэщт, нэужым чIычIэгъ кIуапIэхэмкIэ киловатт 220-р зиIэ подстанцием екIолIэщт. Электростанцием илъэсым киловатт миллион 354-рэ къытыщт.

— Мы проектым ишIуагъэкIэ республикэм электроэнергиемкIэ щыкIагъэу иIэр процент 20-кIэ нахь макIэ хъущт, тапэкIи электричествэу ищыкIагъэ хъущтым фэдизи къыIэкIигъэхьашъущт. Ар республикэм иэкономикэ хэхъоныгъэхэр егъэшIыгъэнхэм, инвестициехэр нахьыбэу къыхэлъхьагъэ хъунхэм фэIорышIэщт зы лъэныкъу, — къыIуагъ  АР-м и ЛIышъхьэ мы псэуалъэм зыщэIэм.

Энергетикэм хэхъоныгъэхэр егъэшIыгъэнхэмкIэ мэхьанэу иIэр къыдалъытэзэ, «зы шъхьаныгъупчъэкIэ» заджэхэрэ шIыкIэм тетэу мы проектыр зэрагъэцакIэрэми КъумпIыл Мурат къыкIигъэтхъыгъ.

БлэкIыгъэ илъэсым иIоныгъо мазэ республикэм ипащэ мы станцием щыIэу апэу къэралыгъом щашIырэ ветропаркым Адыгеим  иэкономикэ хэхъоныгъэхэр ышIынхэм иIахьышхо зэрэхилъхьащтым ицыхьэ зэрэтелъыр къыIогъагъ. АО-у «НоваВинд» зыфиIорэм ипащэ игуадзэу Андрей Нестерук ащ иджэуапэу, станцием ишIын епхыгъэ Iофхэр охътэ кIэкIым зэшIохыгъэ зэрэхъухэрэм, зэгурыIохэу зэрэзэдэлажьэхэрэм афэшI АР-м и ЛIышъхьэ  къызэрэфэразэр къыхигъэщыгъагъ. Урысыем иэнергетикэ хэхъоныгъэхэр егъэшIыгъэнхэм мы проектыр къежьапIэ зэрэфэхъущтыри, Адыгеим ветропаркым ишIынкIэ опытэу иIэр нэмыкI шъолъырхэми зэрящыкIэгъэщтри зэIукIэгъум къыщыхэгъэщыгъэ хъугъагъэ.

Хъут Нэфсэт.