Карантиным ыпкъ къикIэу АР-м хэгъэгу кIоцI къулыкъум иподразделениехэм ащыщхэм яIофшIэн зэхъокIыныгъэхэр фашIыгъэх.

Джы цIыфхэм ялъэIухэр тхыгъэ ыкIи электроннэ шIыкIэм тетэу АР-м хэгъэгу кIоцI IофхэмкIэ и Министерствэ исайт нэкIубгъоу «Прием обращений граждан и организаций» зыфиIорэм ыкIи ащ ипочтэ е министерствэм епхыгъэ район чIыпIэ отделхэм афырагъэхьынхэ алъэкIыщт.

Гъэлъэшыгъэ шIыкIэм тетэу Адыгеим и Къэралыгъо автоинспекцие икъулыкъушIэхэм Iоф ашIэ. ГъогурыкIоныр щынэгъончъэнымкIэ автоинспекцием, джащ фэдэу  административнэ хэбзэукъоныгъэхэм алъэныкъокIэ Iофым изэхэфынкIэ  цIыфхэр зэхамыгъэхьанхэм афэшI къэралыгъо фэIо-фашIэхэр зарафагъэцакIэхэрэм зэхъокIыныгъэхэр фэхъугъэх.

АР-м хэгъэгу кIоцI IофхэмкIэ и Министерствэ кощын IофхэмкIэ игъэIорышIапIэ ыкIи ащ епхыгъэ чIыпIэ подразделениехэм  миграцием епхыгъэ фэIо-фашIэхэр ащафагъэцэкIэнхэмкIэ пэшIорыгъэшъэу зарагъэтхы. Джащ фэдэу документхэр къаIахых, Урысыем щыпсэунхэмкIэ Iизын къазаратыгъэхэу IэкIыбым къикIыгъэхэм Iоф ашIэн алъэкIынымкIэ фитыныгъэхэр аратых. Ащ нэмыкIэу Урысые Федерацием икIынхэ фимытхэу патентхэр афагъэпсых.

Хьапс зэрэптемылъыгъэр къэзыушыхьатырэ тхьапэр джы унэм уимыкIэу бгъэпсын плъэкIыщт.  Ащ пае электроннэ шIыкIэм тетэу къэралыгъо фэIо-фашIэхэр зыщагъэцакIэрэ зыкI порталым зыфэбгъэзэн плъэкIыщт.

ЦIыф зэхахьэхэм защыухъумэным фэшI пэшIорыгъэшъэу мыщ фэдэ номерымкIэ зыхябгъэтхэн плъэкIыщт: 59-66-82.

АР-м хэгъэгу кIоцI IофхэмкIэ и Министерствэ цIыфхэм къяджэх электроннэ шIыкIэм тетэу къэралыгъо фэIо-фашIэхэр зыщагъэцакIэрэ порталэу gosuslugi.ru къызфагъэфедэнэу.

ШъунаIэ тешъотэгъадзэ, бзэджэшIагъэ ыкIи административнэ хэбзэукъоныгъэ зезыхьагъэхэм псынкIэу анаIэ тырадзэнымкIэ Адыгеим иполицие икъулыкъушIэхэм игъэкIотыгъэ Iофтхьабзэхэр зэрахьэх. Урамхэм, зыгъэпсэфыпIэ тIысыпIэхэм ыкIи общественнэ чIыпIэхэм полицием иIофышIэхэм къулыкъур ащахьы.

АР-м и МВД цIыфхэм макъэ арегъэIу, бзэджэшIагъэ ыкIи административнэ хэбзэукъоныгъэ зэрахьагъэу къэбар шъуIэкIэлъмэ, телефонэу 02-м (е мобильнэ телефонымкIэ 102-м) шъутеонэу. Полицием идежурнэ часть зэпыу имыIэу чэщ-зымафэм Iоф ешIэ.

Джащ фэдэу АР-м хэгъэгу кIоцI IофхэмкIэ и Министерствэ ицыхьэшIэгъу телефон Iоф ешIэ. Ащ шъузэрэтеощтыр: (8772) 59-64-88.