Мы илъэсыр къызихьагъэм къыщыублагъэу хэгъэгу зэошхом илъэхъан агъэфедэщтыгъэхэ къэорэ пкъыгъуи 9 Адыгеим къыщагъотыгъ ыкIи агъэкIодыгъ.

Джырэблагъэ Мекъуапэ ошIэ-дэмышIэ Iоф-хэмкIэ къулыкъум ителефон къыфытеохи къараIуагъ къэорэ пкъыгъом яхьщыр къызэрагъотыгъэр. Мы хъугъэ-шIагъэр зыщагъэунэфыгъэм полицием икъулыкъушIэхэр псынкIэу кIуагъэх ыкIи а чIыпIэр къадзыхьагъ.

Росгвардием игъэIорышIапIэу Адыгеим щыIэм испециалистхэм зэрагъэунэфыгъэмкIэ, къэорэ пкъыгъоу къагъотыгъэр Хэгъэгу зэошхом илъэхъан агъэфедэщтыгъэ «минометыр» арэу къычIэкIыгъ. Ар хэушъхьафыкIыгъэ площадкэм ащи къыщагъэуагъ.

 Мыщ ыпэкIэ Урысыем хэгъэгу кIоцI IофхэмкIэ и Министерствэ имежмуниципальнэ отделэу «Адыгейский» зыфиIорэм мыщ фэдэ хъугъэ-шIагъэ щагъэунэфыгъ, Хэгъэгу зэошхом щагъэфедэщтыгъэ лагъымищ шъофым къыщагъотыгъ.

Тэхъутэмыкъое районым щыпсэухэрэми къэорэ пкъыгъо заулэ  къагъотыгъэх. ЧIыпIэ пэпчъ дэгъоу ауплъэкIугъ, нэужым ахэр агъэкIодыгъэх.

Полицием шъугу къегъэкIыжьы! Къэорэ пкъыгъор къэжъугъотыгъэу шъуегуцафэмэ,  ащ изытет ыкIи итеплъэ емылъытыгъэу шъунэмыс ыкIи жъугъэкIодынэу шъупымылъ.

А чIыпIэм цIыфхэр ешъумыгъэкIуалIэх, псынкIэу полицием ителефон номерэу 02-м (мобильнэ телефонымкIэ номерэу 102-м) шъутеуи макъэ яжъугъэIу.