Къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм игъэцэкIэн фэгъэхьыгъэ зэхэсыгъоу тыгъуасэ щыIагъэр зэрищагъ Адыгэ Республикэм и ЛIышъхьэу КъумпIыл Мурат.

Республикэм ипащэ Iофтхьабзэм пэублэ псалъэ къыщишIызэ, къуаджэм щыIакIэу дэлъыр нахьышIу шIыгъэнымкIэ мэхьанэшхо зиIэ программэм къыгъэнэфэрэ къэгъэлъэгъонхэм акIэхьэгъэн зэрэфаер хигъэунэфыкIыгъ.

ГущыIэм пае, къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм къыдыхэлъытагъэу мы илъэсым инженернэ коммуникациехэр зэтырагъэпсыхьэх, социальнэ псэуалъэхэр ашIых, ащ хэхьэх фельдшер-мамыку IэзапIэхэр, культурэм иунэхэр, джащ фэдэу къуаджэм дэс унэгъо ныбжьыкIэхэм ыкIи специалистхэм япсэукIэ амалхэр нахьышIу ашIы.

— Къоджэ чIыпIэхэм хэхъоныгъэ ашIынымкIэ мы программэм амалышIухэр къетых. Ар зэрифэшъуашэу къызфэдгъэфедэн, къуаджэм щыIакIэу дэлъыр нахьышIу тшIыным тыпылъын фае. Ащ дакIоу къихьащт илъэсым телъытагъэу федеральнэ мылъкур къытIэкIэхьаным фэшI нэкъокъоным тыфэхьазырын фае. Ащ пае мыгъэ мы IофшIэнымкIэ тикъэгъэлъэгъонхэр дэгъунхэ фае. Программэм игъэцэкIэнкIэ итхъухьагъэр зэкIэ игъом ыкIи шэпхъэшIухэм адиштэу зэшIотхынхэм мэхьанэшхо иIэн фае, — къыхигъэщыгъ КъумпIыл Мурат.

Доклад шъхьаIэр къышIыгъ Адыгеим мэкъу-мэщымкIэ иминистрэу Къуанэ Анзаур. Ащ къызэриIуагъэмкIэ, зэфэхьысыжь дэгъухэр зэряIэм ишIуагъэкIэ программэм игъэцэкIэн пэIухьащт мылъкоу шъолъырым къыфатIупщыгъэр нахьыбэ хъугъэ. 2019-рэ илъэсым псэолъэ 14-мэ яшIын, язэтегъэпсыхьан сомэ миллион 92,4-рэ тефагъэмэ, 2020-рэ илъэсым объект 59-мэ сомэ миллион 705,5-рэ апэIуагъэхьащт.

Программэм хэлэжьэнхэмкIэ тхьапэхэр шэпхъэшIухэм адиштэу зыгъэхьазырыгъэхэр республикэм имуниципалитети 7. Псэуалъэхэр нахьыбэу зыщашIыхэрэр Мыекъопэ районыр ары. Ащ иадминистрацие ипащэу Олег Топоровым мы IофшIэнымкIэ зэфэхьысыжьхэр къышIыгъэх. АшIынэу щыт псэолъэ 24-м щыщэу 5-р хьазырых. ПсэолъэшI IофшIэнхэм афэгъэзэгъэ организациехэу графикым ыуж къинэхэрэм непэ Iоф адашIэ.

Адыгэкъалэ имэрэу ЛIыхэсэ Махьмуд къызэрэхигъэщыгъэу, сабыибэ зэрыс унагъохэм атырагощэгъэ чIыгу Iахьхэм инфраструктурэр ащагъэпсыгъ, нэмыкI псэуалъэхэм яшIын ыпшъэкIэ зигугъу къэтшIыгъэ програмэм къыдыхэлъытагъ. Культурэм иучреждениеу къуаджэу Улапэ щашIырэм, общественнэ чIыпIэхэм язэтегъэпсыхьан алъэныкъокIэ IофшIэныр нахь агъэлъэшынэу Красногвардейскэ районым иадминистрацие ипащэхэм пшъэрылъ афашIыгъ.

Программэм игъэцэкIэнкIэ мониторингэу зэхащагъэм изэфэхьысыжьхэм къагъэнэфэгъэ гумэкIыгъохэми зэхэсыгъом хэлэжьагъэхэр атегущыIагъэх. Пшъэрылъхэр зэкIэ гъэцэкIэгъэнхэ ыкIи къаIэкIэхьэрэ ахъщэр икъоу гъэфедэгъэн зэрэфаер КъумпIыл Мурат къыхигъэщыгъ. Муниципалитетхэм япащэхэм пшъэрылъ афишIыгъ зэзэгъыныгъэхэм якIэтхэн аухынэу, мылъкур игъом агъэфедэнэу ыкIи программэм игъэцэкIэн пэIухьащт мылъкур чIыпIэ бюджетхэм къахагъэкIынэу.

ШэкIогъум ехъулIэу псэуалъэхэр зэкIэ аухынхэ фае. Ащ дакIоу 2021-рэ илъэсымкIэ программэм игъэцэкIэн фэIорышIэщт проектхэр муниципалитетхэм игъом къагъэхьазырынхэу араIуагъ.

АР-м и ЛIышъхьэ

ипресс-къулыкъу.