Урысыем IофшIэнымкIэ и Министерствэ ифедеральнэ учреждениеу «Медико-социальнэ къэушыхьатынымкIэ бюро ШъхьаIэу Адыгэ Республикэм (Адыгеим) щыIэм» макъэ къызэригъэIурэмкIэ, непэрэ мафэм кIуачIэ иI Урысые Федерацием и Правительствэ и Унашъоу 2020-рэ илъэсым имэлылъфэгъу мазэ и 9-м къыдэкIыгъэу N 467-рэ зытетэу «Сэкъатныгъэ цIыфым зэриIэр къэушыхьатыгъэнымкIэ охътэ гъэнэфагъэ зыпылъ шIыкIэм ехьылIагъ» зыфиIорэм.

Ащ къызэрэдэлъытагъэмкIэ, 2020-рэ илъэсым игъэтхэпэ мазэ и 1-м къыщыублагъэу ичъэпыогъу мазэ и 1-м нэс сэкъатныгъэ зэряIэм икъэушыхьатын тефэмэ, ыпэкIэ цIыфхэм, кIэлэцIыкIухэри ащ къыхеубытэх, сэкъатныгъэу яIэр зыхахьэщтыгъэ купым тетэу илъэсныкъо пIалъэр афылъагъэкIотэнэу. Ащ пае медико-социальнэ къэушыхьатыным къекIолIэнхэр ищыкIагъэп.

Джащ фэдэу охътэ гъэнэфагъэ зыпылъ шIыкIэм къыхеубытэх сэкъатныгъэ зэряIэр апэрэу къызфаушыхьатын фаехэри — медицинэ организациехэм къатырэ тхылъхэр («088/у» зыфиIорэ шапхъэм тетхэр) ащ пае афэбгъэхьынхэ фае ныIэп, медико-социальнэ къэушыхьатыным ибюро укIоныр ищыкIагъэп.

Сэнэхьатым къыхэкIыгъэ уз зиIэхэм е ясэнэхьат IофшIэн агъэцакIэзэ шъобж хэзыхыгъэхэм  Iоф ашIэн зэрамылъэкIыщтым игъэнэфэн, джащ фэдэу сэнэхьатым къыхэкIыгъэ уз зиIэхэм е ясэнэхьат IофшIэн агъэцакIэзэ шъобж хэзыхыгъэхэм язэтегъэуцожьын программэ илъэсныкъо пIалъэкIэ афылъагъэкIотэщт Урысые Федерацием и Правительствэ и Унашъоу 2020-рэ илъэсым имэлылъфэгъу мазэ и 15-м къыдэкIыгъэу N 511-р зытетэу «Сэнэхьатым къыхэкIыгъэ уз зиIэхэм е ясэнэхьат IофшIэн агъэцакIэзэ шъобж хэзыхыгъэхэм Iоф ашIэн зэрамылъэкIыщтыр къэушыхьатыгъэнымкIэ ыкIи сэнэхьатым къыхэкIыгъэ уз зиIэхэм е ясэнэхьат IофшIэн агъэцакIэзэ шъобж хэзыхыгъэхэм язэтегъэуцожьын программэ зэхэгъэуцогъэнымкIэ охътэ гъэнэфагъэ зыпылъ шIыкIэм ехьылIагъ» зыфиIорэм къызэрэдыхэлъытагъэмкIэ. ЫпэкIэ агъэнэфэгъэгъэ зэтегъэуцожьын Iофтхьабзэхэм, зэтегъэуцожьынымкIэ техническэ амалхэри зэрахэтхэу, кIуачIэ яIэщт.

Урысыем IофшIэнымкIэ и Министерствэ ифедеральнэ учреждениеу «Медико-социальнэ къэушыхьатынымкIэ бюро ШъхьаIэу Адыгэ Республикэм (Адыгеим) щыIэм» «илиние плъыр» цIыфхэм зыфагъэзэн алъэкIыщт мыщ фэдэ телефонымкIэ: 8(8772) 55-11-36. Джащ фэдэу электроннэ почтэми Iоф ешIэ: gbmse01@fbmse.ru, Урысыем и ПочтэкIи тхьапэм тетхагъэу зыфагъэзэн алъэкIыщт: 385018, Адыгэ Республикэр, къ. Мыекъуапэ, ур. Курганнэр, 708 «Г».