Адыгэ Республикэм иэкономикэ зыпкъ итэу хэхъоныгъэ ышIынымкIэ Комиссием зэхэсыгъоу иIагъэм Адыгеим и ЛIышъхьэу КъумпIыл Мурат коронавирусыр къызэтегъэуцогъэным епхыгъэ Iофыгъохэм, медицинэ IофышIэхэм ахъщэ тедзэ ятыгъэнымкIэ Урысые Федерацием и Президентэу Владимир Путиным пшъэрылъэу къафишIыгъэр зэрагъэцакIэрэм шъхьафэу ынаIэ ащытыригъэтыгъ.

КоронавирусымкIэ республикэм иIофхэм язытет зыщызэрагъэшIэгъэ уплъэкIунхэм якIэуххэм зэхэсыгъом щатегущыIагъэх. Мы лъэныкъомкIэ республикэм гъогу тэрэз къызэрэхихыгъэр ахэм къагъэлъэгъуагъ.

«Зэпахырэ узым пэуцужьыгъэнымкIэ амалэу зэрахьагъэхэм яшIуагъэкIэ ащ зырамыгъэушъомбгъун алъэкIыгъ. Коронавирусыр къызэутэлIагъэхэр къыхэгъэщыгъэнхэмкIэ тестхэм яшIуагъэ къэкIо. Экономикэм зыкъызэрэрагъэIэтыжьыщтымрэ Iофхэм язытетрэ зэрэзэхъулIэщтхэм лъыплъэгъэн фае. Мыщ дэжьым санитар-эпидемиологие шапхъэхэр къызэрэдалъытэхэрэм гъунэ лъыфыгъэным мэхьанэшхо иI», — хигъэунэфыкIыгъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, Iофхэр нэмыкIэу къызэокIын зэрилъэкIыщтым республикэр фэхьазырын фае. Коронавирусыр къызэутэлIэрэ нэбгырэ 580-мэ зыщяIэзэщтхэ чIыпIэхэр республикэм щагъэхьазырыгъэх. ГоспиталитIумэ Iоф ашIэ. Джыри зы госпиталь Инэм къыщызэIуахынэу щыт. Медицинэ IофышIэхэу ащ щылэжьэщтхэр къагъотыгъэх, ахэр зыщыпсэущт чIыпIэхэри агъэнэфагъэх. Адыгэкъалэ госпиталь къыщызэIухыгъэнымкIэ амалэу щыIэхэр джыдэдэм зэрагъашIэх.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем зэхэсыгъом къащыфиIотагъ медицинэ IофышIэхэм ахъщэ тегъахъор зэраIэкIагъахьэрэм фэгъэхьыгъэу. Ахэм ахъщэ IэпыIэгъуитIу аIокIэ. Коронавирусыр къызэутэлIагъэхэм ыкIи ащ фэдэ щынагъо зышъхьащытхэм IэпыIэгъу афэхъухэрэ медицинэ IофышIэхэм ахъщэ тедзэ ятыгъэныр Урысые Федерацием и Правительствэ ышIыгъэ унашъоу № 415-р зытетым щыгъэнэфагъ. Коронавирусыр къызэутэлIагъэхэм яIэзэрэ медицинэ IофышIэхэм ахъщэ тедзэ ятыгъэныр Урысые Федерацием и Правительствэ ышIыгъэ унашъоу № 484-р зытетми къыщыдэлъытагъ. Медикхэр яIофшIэн кIэгъэгушIугъэнхэм тегъэпсыхьэгъэ унашъохэр Адыгэ Республикэми щаштагъэх. ГущыIэм пае, Урысые Федерацием и Правительствэрэ Адыгэ Республикэм иминистрэхэм я Кабинетрэ яунэшъуитIукIэ сомэ миллиони 165-рэ хъурэ ахъщэ тедзэхэр аIэкIагъэхьагъэх.

«Зытефэрэ пэпчъ ахъщэ тедзэхэр IукIэн фае. Ау зэфэдизэу ахэр атебгуащэ хъущтэп», —хигъэунэфыкIыгъ КъумпIыл Мурат.

Адыгеим и ЛIышъхьэ пшъэрылъ афишIыгъ цIыфхэм ягумэкIхэм икъоу анаIэ атырагъэтынэу, медицинэ IофышIэхэм ятхьаусыхэ тхылъхэм икъоу ахэплъэнхэу.