Зэпахырэ узэу коронавирусыкIэу COVID-19-кIэ зэджагъэхэр къызежьагъэм къыщыублагъэу хэужъыныхьэгъэ уз зиIэхэмкIэ ар щынагъоу зэрэщытыр врачхэм, медицинэм пылъ шIэныгъэлэжьхэм къаIо.

ЗэрагъэунэфыгъэмкIэ, ащ фэдэу уз гъэтIылъыгъэ зиIэм  коронавирусыр къызеуалIэкIэ, ар къегъэбырсыры, вирусыр хагъэкIыгъэми, адрэм фыримыкъухэу бэрэ къыхэкIы. Ащ фэшI, инсульт хъугъагъэу е ащ ищынагъо зиIэхэр анахьэу мы зэпахырэ узым зыщызыухъумэн фаехэм зэращыщхэр врачхэм емызэщэу къаIо. ГухэкIми, мызэу, мытIоу ар аужырэ мэзэ зытIуми къагъэлъэгъуагъ. УФ-м зыухъумэжьынымкIэ и Министерствэ игоспитальхэм ащыщэу, кардиохирургием иотделение ипащэу, медицинэ шIэныгъэхэмкIэ кандидатэу Григорий Громыкэ гупчэ гъэзетхэм ащыщ инсультым ищынагъо зышъхьащытхэм коронавирусым иягъэ зэраригъэкIырэм джырэблагъэ къыщытегущыIагъ. Ащ къызэриIорэмкIэ, коронавирусыр къызэолIагъэу ащ хьылъэ е хьылъэдэдэ ышIыгъэм ытхьабыл е ышъхьэкуцI лъыпцIагъэ иуцон ылъэкIыщт. Ары ащ фэдэм инсульт къеолIэным ищынагъо шъхьащытэу зыкIалъытэрэр. ЛъыпцIагъэм шъхьэкуцIым Iоф езыгъашIэрэ лъынтфэр зызэфишIыкIэ, лъыр рымыкIожьэу ар егъалIэ. Ащ тетэу «ишемический» зыфаIорэ инсультыр цIыфым къео. Врачым къызэриIотагъэмкIэ, инсультыр зэфэшъхьафитIоу зэтырафы. «Геморрагический» зыфаIорэр лъыр лъэшэу зэрэдэкIоягъэм (повышенное давление), шъхьэкуцIым екIурэ лъынтфэхэр зэрэзэщыкъуагъэхэм къахэкIын ылъэкIыщт. ТIумкIи лъынтфэхэр афэмыщыIэу къызэIэутхэшъ, шъхьэкуцIым лъыпцIагъэр еуцо, ащ а зыдэуцугъэ чIыпIэм Iоф ымышIэжь ешIы. «ИшемическэкIэ» заджэхэрэр цIыфым ыныбжь хэкIуатэу илъынтфэхэр зэхэкIыхьэхэмэ е лъыпцIагъэр, нахьыбэрэмкIэ ар гум къекIы, шъхьэкуцIым екIумэ ахэм къахэкIы. Гур мыпсаоу, тэрэзэу Iоф ымышIэрэмэ, ащ фэдэ инсульт къыздихьынкIэ щынагъо мэхъу. «Аритмия сердца» зыфиIорэ узыр врачым щысэу къыхьыгъ ыкIи ар непэ хирургическэ шIыкIэхэмкIэ зэрагъэхъужьырэм къыкIигъэтхъыгъ. Ишемическэ инсультыр нахьыбэу бзылъфыгъэхэм къяуалIэу ары къызэриIуагъэр. НыбжьыкIэхэм лъынтфэ уз горэ къадэхъугъэу яIэмэ ары ащ ищынагъо ашъхьащыт зыхъурэр. Джащ фэдэу цIыфым янэ, ятэ, янэжъ, ятэжъ гу-лъынтфэ узхэр яIагъэхэу, инсульт къяолIэгъагъэу щытымэ ежьыри ар къеонкIэ щынагъо мэхъу. Мы уз тхьамыкIагъор къеолIэным ищынагъо зышъхьащытхэр, гум епхыгъэ уз зиIэхэр сыдигъокIи япсауныгъэ пстэумэ анахьэу фэсакъынхэ, врачым дэжь игъом кIонхэ фае, уц Iэзэгъоу къафыратхыкIыгъэхэм            игъом ямышъомэ хъущтэп. Ахэм тутыныр, шъон пытэхэр къаухьанхэ, япсауныгъэ къызэтезгъэнэщт шапхъэхэр агъэцэкIэнхэ фае. Джыдэдэм коронавирус щынагъом зызщиушъомбгъурэ уахътэм анахьэу сакъыныгъэ къызхагъэфэныр шIокI зимыIэ Iоф. Мыхэм афэдэу зыныбжь хэкIотагъэхэри коронавирусым фэсакъынхэ фае. Сыда пIомэ, джыри зэ къэтэIожьы, COVID-19-р хэужъыныхьэгъэ уз зиIэхэмрэ зыныбжь хэкIотагъэхэмрэ анахьэу афырекъу. ХЪУТ Нэфсэт.