Мыекъуапэ иурамэу Димитровым ыцIэ зыхьырэм игъогу изы Iахь гъэцэкIэжьынэу щашIыгъэхэр бэкIэ нахь псынкIэу къаухыгъэх. «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэ лъэпкъ проектым къыдыхэлъытагъэу IофшIэнхэр рагъэкIокIыгъэх.

Мы чIыпIэм километри 2-м ехъурэ гъогур ыкIи лъэсрыкIо гъогухэр агъэкIэжьыгъэх, аужырэ шапхъэхэм адиштэрэ къэуцупIэхэр ашIыгъэх, гъогу тамыгъэхэр зэблахъугъэх, гъогу напцэри агъэдэхагъ.

— Гъогум телъ асфальтыр аужырэ шапхъэхэм адиштэрэ шIыкIэмкIэ зэблахъугъ. Ащ ишIуагъэкIэ гъогур нахьыбэрэ агъэфедэн амал щыIэ хъугъэ, — къыIуагъ Адыгэ Республикэм   псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан.

ЫпэкIэ зигугъу къэтшIыгъэ лъэпкъ проектым къыдыхэлъытагъэу  2024-рэ илъэсым ыкIэм ехъулIэу IофшIэнхэр процент 80-м нэсэу агъэцэкIэнхэ фае.

Проектым къыдыхэлъытагъэу мыгъэ Мыекъуапэ игъогу объекти 8-мэ гъэцэкIэжьынхэр ащашIынхэу агъэнафэ. ЖъоныгъуакIэм ыкIэм  зэфэхьысыжьэу ашIыгъэхэм къызэрагъэлъагъорэмкIэ, IофшIэнхэр зэкIэ графикым ыпэ аухыгъэх. Ахъщэу къызэтырагъэнагъэмкIэ Мыекъуапэ иурамэу Весеннем къыщегъэжьагъэу Гончаровым нэс гъэцэкIэжьынхэр щашIыщтых.

Шъолъыр проектым къыдыхэлъытагъэу Мыекъуапэ игъогухэм язэтегъэпсыхьан мы илъэсым сомэ миллион 200-м ехъу пэIуагъэхьащт. Мылъкур федеральнэ ыкIи шъолъыр бюджетхэм къахэхыгъ.

Гъонэжьыкъо

Сэтэнай.