Cабыйхэр зэрыс унагъохэм IэпыIэгъу афэхъугъэным волонтер-молодогвардейцэхэм мэхьанэшхо раты.

КIэлэцIыкIухэм якъэухъумэн и Дунэе мафэ ехъулIэу партием иволонтер гупчэ хэтхэм сабыибэ зэрыс Хьабыймэ яунагъо гъомылапхъэхэр зэрылъ Iалъмэкъ фахьыгъ. Ахэр ыпэкIэ  «линие плъырым» къытеогъагъэх, ялъэIу арагъэтхыгъагъ. Iалъмэкъым игъусэу «Тайная школа юных героев» зыфиIорэ кIэлэцIыкIу тхылъыри аратыгъ. Урысые общественнэ организациеу «Единэ Россием и НыбжьыкIэ Гвардие» игукъэкIкIэ тхылъыр къыдагъэкIыгъ.

— «Тайная школа юных героев» зыфиIорэр шъхьи 9-у зэтеутыгъ. КIэлэцIыкIухэм лIыхъужъныгъэу зэрахьагъэр къизыIотыкIырэ рассказ зэфэшъхьаф 70-рэ автормэ къаугъоигъ. Тхылъым къызэригъэлъагъорэмкIэ, мыщ герой шъхьаIэу хэтхэр зэрэугъоих,  дунаир къаухъумэн пшъэрылъ зыфагъэуцужьы. ЗыкIыныгъэм, ныбджэгъуныгъэм, гукIэгъуныгъэм тхылъым уафещэ, — къыIуагъ Урысые общественнэ организациеу «Единэ Россием и НыбжьыкIэ Гвардие» и Адыгэ шъолъыр къутамэ ипащэу, Мыекъуапэ инароднэ депутатхэм я Совет идепутатэу Бэрзэдж Асет.

— Мыщ фэдэ охътэ мыпсынкIэм тисабыйхэм анаIэ къатырадзи, мэфэкIымкIэ къызэрэтфэгушIуагъэхэр лъэшэу тигуапэ хъугъэ, — къыIуагъ Хьабый Суандэ. — Тхылъыр кIэлэцIыкIухэм ашIогъэшIэгъон, тызэгъусэу тызэдеджэщт. Джащ фэдэу гъомылапхъэхэр къызэрэтфахьыгъэмкIи тафэраз.

Гъонэжьыкъо

Сэтэнай.