«Семья года» зыфиIорэ шъолъыр зэнэкъокъум икIэуххэр зэфахьысыжьыгъ. Ар заочнэ шIыкIэм тетэу кIуагъэ, къагъэхьыгъэ тхылъхэмкIэ анахь дэгъухэр къыхахыгъэх.

Республикэм имуниципальнэ образованиехэм ащыщ унагъохэр ащ хэлэжьагъэх ыкIи лъэныкъо зэфэшъхьафхэмкIэ заушэтыгъ.

ЛъэныкъуитфыкIэ текIоныгъэр къыдэзыхыгъэхэр агъэнэфагъэх.  Адыгеим къыщыхахыгъэ унагъохэр Урысые зэнэкъокъум иаужырэ едзыгъо хэлэжьэщтых.

Мыекъопэ районым щыщ зэшъхьэгъусэхэу Александр ыкIи Лидия Кривых  «Золотая семья России» зыфиIорэ лъэныкъомкIэ текIоныгъэ къыдахыгъ. «Сельская семья» зыфиIорэмкIэ Набэкъо Айдэмыррэ Зитэрэ къахэщыгъэх. Ахэр Шэуджэн районым щэпсэух. «Многодетная семья» зыфиIорэ лъэныкъомкIэ ХьакIэко Казбекрэ Сусаннэрэ къыхагъэщыгъэх. Ахэр Тэхъутэмыкъое районым щыщых. «Унэгъо ныбжьыкI» зыфиIорэ лъэныкъомкIэ Мыекъуапэ щыщ Олег ыкIи Александра Капненовхэм текIоныгъэр афагъэшъошагъ. Теуцожь районым щыщхэу НэмытIэкъо Аслъанрэ МулиIэтрэ «Семья — хранитель традиций» зыфиIорэ лъэныкъомкIэ текIоныгъэ къыдахыгъ.

Мэхьэнэ ин зиIэ зэнэкъокъухэм мыр ащыщ, зызэхащэрэм къыщегъэжьагъэу Адыгеир чанэу хэлажьэ. Илъэс къэс лъэныкъо зэфэшъхьафхэмкIэ Урысыем къыщыхагъэщырэ унагъохэм тиреспубликэ икIыгъэхэр ащыщых. Щысэ зытепхын фаеу Адыгеим исыр макIэп, ащ къеушыхьаты унагъом иинститут гъэпытэгъэным фэIорышIэрэ Iофтхьабзэхэр чанэу тишъолъыр зэрэщагъэцакIэхэрэр.

УФ-м IофшIэнымкIэ ыкIи социальнэ ухъумэнымкIэ и Министерствэ щыIэныгъэм чIыпIэ къин ригъэуцогъэ сабыйхэм IэпыIэгъу афэхъугъэнымкIэ  Фондыр игъусэу «Семья года» зыфиIорэ зэнэкъокъум кIэщакIо фэхъугъэх. 2016-рэ илъэсым Iофтхьабзэр  апэрэу зэхащагъ. Ащ текIоныгъэ къыщыдэзыхыгъэхэм Адыгеим икIыгъэхэри  ахэфагъэх. Апэрэу рагъэкIокIыгъэ зэнэкъокъум Красногвардейскэ районым щыщ зэшъхьэгъусэхэу Михаил ыкIи Валентина Зайцевхэр «Сельская семья» зыфиIорэ лъэныкъомкIэ пстэуми къахэщыгъэх.

ЫпэкIэ къызэрэщытIуагъэу, мыгъэ шъолъыр зэнэкъокъум къыщыхахыгъэ унагъохэр Урысые зэнэкъокъум иаужырэ едзыгъо хэлэжьэщтых. Ащ текIоныгъэ къыщызыхьыгъэхэр мы илъэсым чъэпыогъум и 20-м Москва щагъэшIощтых.

Гъонэжьыкъо Сэтэнай.