Пандемием илъэхъан Iоф зышIэрэ социальнэ къулыкъушIэхэм республикэмкIэ сомэ миллион 30 фэдиз атырагощэщт.

Социальнэ фэIо-фашIэхэр зыгъэцэкIэрэ стационар организациехэм аIутхэр арых тыныр зыIукIэрэр. Мы Iофыгъом пэIухьащт сомэ миллион 18,7-р — Урысыем и Правительствэ иIэпэчIэгъэнэ фонд, сомэ миллион 11,1-р — республикэ бюджетым къахэхыгъэх.

Джащ фэдэу, мыщ фэдэ тынхэр медикхэми атырагуащэ. УФ-м и Правительствэрэ Адыгеим иминистрэхэм я Кабинетрэ яунашъохэм адиштэу ахэм сомэ миллиони 165-рэ аратынэу щыт, непэрэ мафэм ехъулIэу сомэ миллион 48-р аIэкIагъэхьагъ.

— Зытефэрэ пстэуми ахъщэр анэсын фае. Ау зэкIэхэри зэфэдэ пшIынхэр тэрэзэп. Ащ дакIоу пшъэрылъыр гъэцэкIагъэ зэрэхъурэм лъыплъэгъэным мэхьанэшхо иI, — къыIуагъ Адыгэ Республикэм и ЛIышъхьэу КъумпIыл Мурат.

ЦIыфэу закъыфэзыгъазэхэрэм ягумэкIыгъохэм, медицинэм иIофышIэхэм ядао пэпчъ ахэплъэгъэн, зэхэфыгъэн ыкIи IэпыIэгъу афэхъугъэн зэрэфаер республикэм ипащэ хигъэунэфыкIыгъ. Социальнэ лъэныкъом епхыгъэу Iоф щызышIэрэ пстэуми КъумпIыл Мурат афэрэзагъ, тапэкIи мыщ фэдэ зэгурыIоныгъэ азыфагу илъэу, шIуагъэ къытэу зэдэлэжьэнхэм мэхьанэшхо зэриIэр ипсалъэ къыщыхигъэщыгъ.

(Тикорр.).