Апэрэ ахъщэ IэпыIэгъур къафэкIуагъ
Коронавирусым тикъэралыгъо зызщиушъомбгъурэ уахътэм кIэлэцIыкIухэм яIофыгъохэр УФ-м и Президент инэплъэгъу ригъэкIыгъэхэп.
Ащ игукъэкIкIэ ахэм къэралыгъо IэпыIэгъу афэкIонэу агъэнэфагъ. Илъэси 3-м къыщегъэжьагъэу 15-м нэс зыныбжь кIэлэцIыкIу пэпчъ зэтыгъоу сомэ мини 10 къараты. Мыщ дэжьым унагъом ихахъуи, ны-тыхэм IофшIэпIэ чIыпIэ яIэми мэхьанэ иIэп. Унашъоу щыIэмкIэ мы купым къыхиубытэхэрэм зэкIэми ахъщэр аратыщт.
УФ-м ПенсиехэмкIэ ифонд къызэритырэмкIэ, апэрэ зэтыгъо ахъщэр унагъохэм къаIэкIэхьэгъах. Унэгъо миллион 10,2-мэ ащыпсэурэ кIэлэцIыкIу миллион 14,6-мэ сомэ мини 10 зырызыр афэкIуагъ. Джырэ уахътэм ехъулIэу сомэ миллиарди 146-рэ мыщ пэIуагъэхьэгъах.
ЖъоныгъуакIэм и 22-м нэс заявление зыгъэхьыгъэ ны-тыхэр арых ахъщэр къызыфихьагъэр. Регламентэу щыIэм къызэригъэнафэрэмкIэ, мы тыныр зытефэхэрэм ятхылъхэм IофшIэгъу мэфитфым ахэплъэх, етIанэ IофшIэгъу мэфищым ахъщэр афырагъахьэ.
Мыщ пылъ пIалъэр мэфиим шIокIы хъущтэп, загъорэ ащ нахь макIэуи мэхъу. ГущыIэм пае, заявлениер жъоныгъуакIэм и 23-м (шэмбэтым) щегъэжьагъэу и 25-м (блыпэм) нэс агъэхьыгъэ зыхъукIэ, жъоныгъуакIэм и 29-м нэс ащ хэплъэщтых, мэкъуогъум и 2-м ахъщэр къафихьащт.
НэмыкI шъолъырхэм афэдэу мы зэтыгъо ахъщэ IэпыIэгъур Адыгеим щыпсэурэ унагъохэм ащыщхэм къаIэкIэхьагъ. Ащ цIыфхэр ыгъэгушIуагъэх, бэхэм игъо дэдэу алъытагъ.
КIэлэцIыкIу зиIэ унагъохэм ахъщэ IэпыIэгъу аратынымкIэ УФ-м и Президент унашъоу ышIыгъэхэм мэхьанэшхо яIэу елъытэ сабыищ зыпIурэ Шъхьэлэхъо Светланэ.
— Мы къэбарыр зызэхэсэхым ищыкIэгъэщтым сыкIэупчIагъ, игъом тхылъхэр згъэхьазырыгъэх. Унэм сызэрисэу къэралыгъо фэIо-фашIэхэм ягъэцэкIэн фытегъэпсыхьэгъэ порталымкIэ жъоныгъуакIэм и 16-м заявлениер згъэхьыгъэ. Сызэремыжагъэу ахъщэр псынкIэу счетым къихьагъ, — къеIуатэ Светланэ. — Сабыйхэм яфэIо-фашIэхэм ахъщэр апыIузгъэхьащт. Апэрэ классым кIощт пшъэшъэ нахьыжъым ищыкIэгъэщт Iэмэ-псымэхэр фэсщэфыщтых. ЕджэнымкIэ, тхэнымкIэ къышъхьэпэщт мебелыр, ишIэныгъэхэм ахэзгъэхъощт псэуалъэхэр зэзгъэгъотыщтых. НахьыкIэхэри зыщызгъэгъупшэщтхэп, тхылъ цIыкIухэр, щыгъынхэр къафэсщэфыщтых.
Гъонэжьыкъо Сэтэнай.