Тылым Iутыгъэу, культурэм изаслуженнэ IофышIэу Ацумыжъ Кущыку ыныбжь илъэс 90-рэ зэрэхъугъэр хигъэунэфыкIыгъ. Шэуджэн районымкIэ заом ыкIи IофшIэным, УIэшыгъэ КIуа­чIэхэм ыкIи ухъумэкIо къулыкъухэм яветеранхэм (пенсионерхэм) я Совет илъэс 20-рэ ар итхьамэтагъ. Адыгэ Республикэм и Къэралыгъо Совет — Хасэм и Щытхъу тамыгъэу «Хабзэр. Пшъэрылъыр. ЦIыфыгъэр» къыфагъэшъошагъ, IофшIэным иветеран.

Ацумыжъ Кущыку 1930-рэ илъэсым шапсыгъэ унагъом (къу. Афыпсып) къихъухьагъ. Ау уахътэм къыгъэуцугъэ шапхъэхэм атетэу Хьакурынэхьаблэ дэсын фае мэхъу. 1956-рэ илъэсым Адыгэ хэку исполкомым культурэмкIэ игъэIорышIапIэ ипащэу М. И. Быщтэ­къом иунашъокIэ район культурэм и Унэ идиректорэу Кущыку агъэнафэ.

Iофтхьэбзэшхоу зэхащэхэрэм цIыфыбэ къахигъэлэжьэныр ащ ишэныгъ, номерхэр зэхагъэуцонхэмкIэ IэнатIэ зыIыгъхэр IэпыIэгъу къызфигъэхъущтыгъэх. Ащ фэдэ шIыкIэ амалэу агъэфе­дэхэрэм район культурэм и Унэ ныбжьыкIэхэм ямызакъоу, ныбжь зэфэшъхьаф зиIэ цIыфхэр къырищалIэщтыгъэх.

Шэуджэн район советым культурэмкIэ иотдел ипащэу илъэс 31-рэ Iоф ышIагъ. СССР-м культурэмкIэ и Министерствэ итамыгъэу «За отличную работу» зыфиIорэр къыратыгъ, «АР-м культурэмкIэ изаслуженнэ IофышIэ» щытхъуцIэр апэрэу республикэмкIэ къызыфагъэшъо­шагъэхэм ащыщ. Партием зыхахьэм, район исполкомым ипартбюро исекретарэу хадзыгъ, нэужым народнэ депутатхэм ярайон совет идепутатэу щы­тыгъ. «Шэуджэн районым ицIыф ГъэшIуагъ» зыфиIорэ щытхъуцIэр къоджэдэсхэм фагъэшъошагъ. Непэ Ацумыжъыр къы­лэжьыгъэ зыгъэпсэфыгъом щыI. (Тикорр.).