ШIокI зимыIэ пенсионнэ страхованием фэгъэ­хьыгъэ федеральнэ хэбзэгъэуцугъэм зэхъокIыныгъэу фашIыгъэхэм къызэращыдэлъытагъэм тетэу, пенсионерэу зыныбжь имыкъу­гъэхэм алъыплъэхэрэм япенсиехэр индексацие шIыгъэ­хэу бэдзэогъум и 1-м къы­щыублагъэу къафэ­кIощтых.

Ахэм лъэIу тхылъхэр амытыхэу къызхэхъогъэ пенсиер къафэкIоным фэшI, УФ-м ПенсиехэмкIэ ифонд и Къутамэу АР-м щыIэм испециалистхэм спискэр егъэхьазыры, мэкъу­огъум и 24-м нэс пенсиехэр аIэкIэзгъахьэрэ организациехэм тхылъхэр афагъэкIощтых. ПэшIорыгъэшъэу къызэралъыта­гъэмкIэ, нэбгырэ 90-рэ мэхъу мы индексациер зынэсыщтыр.

Ащ фэдэу зыныбжь имыкъугъэм лъыплъэрэ пенсионерыр шIокI зимыIэ пенсионнэ страхованием къыхеубытэ. Арышъ, ащ фэдэхэм апае страхованиемкIэ взносхэр фондым къы­фэкIох. Зыныбжь имыкъугъэм зэрэлъыплъэщт пIалъэу законым къафигъэнэфагъэр заухыкIэ, страхованиемкIэ пенсиер, индексациехэри къыдэлъытагъэхэу, къафэкIонэу регъажьэ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.