Гъэзетхэм, журналхэм якъитхыкIыгъу. «Адыгэ макъэм» еджэхэрэм яеплъыкIэхэр зэдгъашIэхэ тшIоигъоу гущыIэгъу тызыфэхъугъэхэм къытаIуагъэм шъущытэгъэгъуазэ.

Зыхьэ Заурбый, Урысыем изаслуженнэ артист, Адыгэ Республикэм инароднэ артист.

— Уадыгэу зыолъытэжьмэ, «Адыгэ макъэм» уеджэн фае. Унагъом адыгабзэкIэ ущыгу­щыIэным мэхьэнэ ин иI. ЯцIыкIугъом къыщегъэжьагъэу адыга­бзэкIэ япIорэр гум нахь лъэIэсы. Тиныдэлъфыбзэ ибаиныгъэ нахьышIоу зэзыгъашIэ зышIоигъохэр Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм икъэгъэ­лъэгъонхэм яплъынхэу къетэ­гъэблагъэх. «Адыгэ макъэмрэ» Лъэпкъ театрэмрэ зэныбджэгъух. Гъэзетым къыIэтырэ Iо­фыгъохэр гъэ­цэкIэгъэнхэм фэшI пчыхьэзэхахьэхэр, зэIукIэгъу гъэ­шIэгъонхэр тищыкIагъэх — ахэр зэхэтщэнхэ тлъэкIыщт.

Бэрэтэрэ Аслъан, IофшIэным иветеран, Мыекъуапэ щэпсэу.

«Адыгэ макъэр» къисэтхыкIы. Адыгэхэм ятарихъ, шэн-хабзэ­хэм, культурэм, спортым яхьы­лIагъэхэм сяджэныр нахь сшIогъэшIэгъон. Адыгэ къуаджэхэм афэгъэхьыгъэ тарихъ къэбархэр гъэзетым нахьыбэрэ къыщы­хаутыхэ сшIоигъу. Республикэм ис лъэпкъхэм, щыIэныгъэм гъо­гу дахэ къыщызыкIугъэхэм, ти­лъэпкъ илIыхъужъхэм афэгъэ­хьыгъэхэри «Адыгэ макъэм» на­хьыбэрэ къыхиутынхэу сыфай.

Республикэ общественнэ движениеу «Адыгэ Хасэм» лъэпкъ Iофыгъоу ыгъэцакIэхэрэр цIыф­хэм алъыгъэIэсыгъэнхэмкIэ гъэ­зетым къыхиутырэр макIэп. Арэу щытми, Адыгэ Хасэм ныдэлъфыбзэм, тарихъым язэгъэшIэнкIэ къыIэтырэ Iофыгъохэр икъоу гъэцэкIагъэ хъухэрэп. Ащ фэдэ гумэкIхэр зэрэтиIэхэм ха­бзэм икъулыкъушIэхэм яеплъыкIэхэр куоу къыщарэIуатэх.

Тэхъутэмыкъое районым щыщ бзылъфыгъ.

— Сызыщыпсэурэр унэгъо Iужъу, «Адыгэ макъэр» къитэтхыкIы. Гъэзетыр игъом къыт­лъыIэсырэп, почтальоным гу­жъуагъэу къызэрэтфихьырэм тесэжьыгъ. ЛэжьапкIэу ащ ратырэр макIэшъ, тыубырэп.

«Адыгэ макъэм» къыхиуты­хэрэр Интернетым щытэгъотых, тшIогъэшIэгъонэу тызаджэрэр бэ. НыбжьыкIэу адыгэ гъэзетым еджэхэрэм япчъагъэ сшIомакI. Ар тигумэкIыгъо шъхьа­Iэхэм ахэсэлъытэ.

АдэгущыIагъэр ЕмтIылъ Нурбый.