Коронавирусым зимыушъомбгъуным пае ре­жим гъэнэфагъэу субъектхэр зытехьэ­гъагъэ­хэм игъорыгъоу къытекIыжьынхэу рагъэжьагъ.

ХъызмэтшIапIэхэр, салон зэфэшъхьафхэр, щапIэхэр, нэмыкIыбэхэр къызэIуахыжьых, цIыфэу урамхэм атетыр, общественнэ транспортыр зыгъэфедэрэр нахьыбэ мэхъу зэпыт. Ащ фэшI Роспотребнадзорым вирусым ущызыухъумэрэ маскэхэмрэ Iалъэхэмрэ зэкIэми агъэфедэн фаеу къыгъэнэфагъ.

Ащ детэгъаштэ, зэкIэми ар агъэцэкIэн, ежьхэм япсауныгъи, къэзыуцухьэхэрэми афэсакъынхэ фае. Ау мыщ дэжьым къыщыкIэдгъэтхъымэ тшIоигъу маскэу, Iалъэу бгъэфедэгъахэр зэрибдзыжьыщтыми шапхъэ зэриIэм. ООО-у «ЭкоЦентрэм» и Адыгэ шъолъыр къутамэ Iоф­шIэным икъэухъумэнкIэ испециалистэу Лариса Леонович къызэриIуагъэмкIэ, ахэр шъхьафэу пакетым иплъхьанхэшъ, нэужым хэкIым хэбдзэн фае, зыпарэми кIоцIымылъэу ибдзыжьхэмэ, яягъэ къэкIонкIэ щынагъо.

ЗэкIэми ар агъэцэкIэнэу «Эко­Центрэр» къялъэIу! ООО-у «ЭкоЦентрэм» и Адыгэ шъолъыр къутамэ ипресс-къулыкъу

ИмычIыпIэ щыратэкъугъ

Мыекъуапэ ирайонэу «МэздахэкIэ» заджэхэрэр гъэпсэфыпIэ чIыпIэу къалэм иIэхэм зэу ащыщ. Ащ фэшI «ЭкоЦентрэм» иIофшIэн зырегъажьэм ащ хэкIитэкъупIэ площадкэ щигъэпси, контейнериплI щигъэуцугъэу мафэ къэс ахэм пыдзафэу аратэкъуагъэр Iуещы.

Джырэблагъэ зыгорэм кубометрэ 30 фэдиз хъунэу автомобилым къыпыкIыгъэ пыдзафэхэр мы чIыпIэм щыритэкъугъэх. Ар зышIагъэр региональнэ операторым хэкIыр зэрэIуищыщытым фэгъэхьыгъэ зэзэгъыныгъэ дэзымышIыгъэ е хэкIэу къыдищырэр зыфэдиз шъыпкъэр зыушъэфыгъэ предпринимателэу законыр зыукъохэрэм ащыщэу тегуцафэ.

— ХэкIыр имычIыпIэ щиптэкъумэ административнэ пшъэдэкIыжь зэрэпхьыщтыр юридическэ лицэхэмрэ предпринимательхэмрэ къагурыIон фае. Зэзэгъыныгъэм укIатхэмэ ары тазырыр зымытыщтыр, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый иеплъыкIэ къыриIотыкIызэ.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.