Урысыем, дунаим ащыкIохэрэ спорт зэнэкъокъухэм Тэхъу­тэмыкъое районым щыщхэр ахэлажьэх, хагъэунэфыкIырэ чIыпIэхэр къащыдахых.

2019-рэ илъэсым районым испортсменхэм тагъэгушIуагъ. Анахьэу къыхэдгъэщымэ тшIоигъор гъэхъагъэ зыщашIырэ спорт лъэпкъхэр нахьыбэ зэрэхъугъэ- хэр ары.

Атлетикэ онтэгъур

Хэгъэгум ихэшыпыкIыгъэ коман­дэ хэтэу Роман Бочковым Урысыем и Кубок къыдихыгъ, дышъэр къыфагъэшъошагъ. Батырыр спортымкIэ дунэе класс зиIэ мастерэу Роман Казаковым егъасэ.

— Хэгъэгу ыкIи дунэе зэIукIэгъухэм медальхэр къащыдэзыхырэ Роман Бочковым иIэпэIэсэныгъэ хэпшIыкIэу хегъахъо, — къытиIуагъ Адыгэ Республикэм атлетикэ онтэгъумкIэ испорт еджа­пIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Роман Бочковыр Урысыем ихэшыпыкIыгъэ командэ хэт, Олимпиадэ джэ­гунхэу Токио щыкIощтхэм ахэлэжьэнэу зегъэхьазыры.

Урысыем иныбжьыкIэхэм язэ­нэкъокъоу къалэу Старый Оскол щызэхащагъэм районым испорт еджапIэу N 2-м зыщызыгъэсэрэ Артем Горловыр хэлэжьагъ. ШIыкIэу рывокым килограмми 117-рэ къыщиIэти, джэрзыр къы­дихыгъ. Тренерэу Александр Горловыр кIэлэеджакIом ипащ.

Урым-рим бэнакIэр

Ростов хэкум икъалэу Шахты къыблэм иныбжьыкIэхэу илъэс 18-м къемыхъугъэхэм язэнэ­къо­къу Тэхъутэмыкъое районым ибэнакIохэр хэлэжьагъэх. Килограмм 80-м нэс къэзыщэчыхэрэм якуп урым-рим бэ­накIэмкIэ Камалудин Магоме­довым зэIукIэм дышъэр къыщыдихыгъ. Спорт еджапIэу N 3-м ащ зыщегъасэ.

ЛъэпцIэрышэ Арамбый, кг 42-рэ, ЛIыбзыу Аскэр, кг 51-рэ, Антон Осиповым, кг 65-рэ, ты­жьыныр къафагъэшъошагъ. Къэлэкъутэкъо Дамир, кг 48-рэ, Шъэумыз Юрэ, кг 65-рэ, Къэлэ­къутэкъо Адамэ, кг 55-рэ, джэрзыр къыдахыгъ.

Урысыем иныбжьыкIэхэм урым-рим бэнакIэмкIэ язэнэ­къокъоу къалэу Владимир щы­кIуагъэм илъэс 18-м нэс ныбжьыкIэхэр щызэIукIагъэх. Камалудин Магомедовым джэрзыр къыфагъэшъошагъ. Къэлэкъутэкъо Дамир тыжьын къыхьыгъ.

Тренерэу А. ЦIэгъошIум зэри­лъытэрэмкIэ, тибэнакIохэм сэнаущыгъэ ахэлъ, Европэм иныбжьыкIэхэм, нэмыкIхэм язэIукIэгъухэм ахэлэжьэнхэу загъэхьазыры. Урысыем икIэлэеджакIохэм я Спартакиадэ хэхьэрэ ятIонэрэ едзыгъоу Ростов-на-Дону щы­кIуагъэм Тэхъутэмыкъое районым ибэнакIохэм щытхъур къыщахьыгъ. ЛъэпцIэрышэ Арамбый, кг 42-рэ, спорт еджапIэу N 1-м зыщегъасэ, апэрэ чIыпIэр къыдихыгъ. Килограмм 55-м нэс къэзыщэчыхэрэм якуп Къэлэ­къутэкъо Адамэ дышъэр къыщи­хьыгъ. Нарт шъаом спорт еджапIэу N 2-м зыщегъасэ. ЛIыбзыу Аскэр, кг 51-рэ, тыжьыныр къыдихыгъ. Антон Осиповыми, кг 65-рэ, ятIо­нэрэ чIыпIэр къыхьыгъ.

ШъэуапцIэкъо Руслъан, кг 60, Камалудин Магомедовым, кг 80, Къадэ Даур, кг 92-рэ, ящэнэрэ чIыпIэхэр къыдахыгъэх. ТекIоныгъэм икъыдэхынкIэ гуетыныгъэ ин къызэрэзыхигъэ­фагъэм фэшI Къэлэкъутэкъо Адамэ хэушъхьафыкIыгъэ шIу­хьафтын Спартакиадэм къыщыфагъэшъошагъ.

Адыгэ Республикэм ихэшыпыкIыгъэ командэ Спартакиадэм ящэнэрэ чIыпIэр къыщыдихыгъ.

Къэлэкъутэкъо Дамир, кг 48-рэ, Европэм иныбжьыкIэхэм язэ­нэкъокъоу Италием щыкIуагъэм тыжьыныр къыщыдихыгъ. — Тренерхэу Къадэ Руслъан, ЦIэгъошIу Адамэ, фэшъхьафхэм агъасэхэрэ кIалэхэр спортым цIэрыIо щыхъунхэ алъэкIыщт, — къытиIуагъ Тэхъутэмыкъое райо­ным физкультурэмкIэ ыкIи спор­тымкIэ и Комитет иIофышIэу ЦIы­кIу Налбый. — Урысыем икIэлэеджакIохэм я Спартакиадэ хэхьэрэ кIэух зэнэкъокъоу Москва хэкум икъалэу Раменскэм щыкIуагъэм ЛъэпцIэрышэ Арамбый джэрзыр къыщихьыгъ. ТиныбжьыкIэхэм ямедальхэм ахагъэхъонымкIэ амалышIухэр яIэх.

Самбэр, дзюдор

Урысыем самбэмкIэ, дзюдомкIэ изэIукIэгъухэу «Къырым и ШIухьафтын» зыфиIоу Ялтэ щызэхащагъэм районым испорт еджапIэу «Шапсыгъэм» зыщызыгъасэхэрэм апэрэ чIыпIиплI къы­щыдахыгъ. Андрей Пихулиным, кг 27-рэ, Ацумыжъ Ринат, кг 30, Ацумыжъ Щамил, кг 34-рэ, Джарымэ Ибрахьим, кг 38-рэ, текIоныгъэр къыдахыгъ.

Тренерхэу Ацумыжъ Азэмат, ХыдзэлI Мурат, Ацумыжъ Заур, фэшъхьафхэри кIэлэцIыкIу спортыр къэIэтыгъэным пылъых. Нэ­гъуцу Мурат, Хьагъур Алибек, СултIэнэ Салбый я 4-рэ чIыпIэхэр хэгъэгу зэIукIэгъум къыщыдахыгъэх.

— КIэлэцIыкIухэм яапэрэ гъэ­хъагъэхэм мэхьэнэ ин яI, — къе­Iуатэ тренерэу Нэгъуцу Азэмат. — ТекIоныгъэр къызэрэдахыгъэм рэгушхох, спортышхом щы­лъы­кIотэнхэмкIэ лъэпсэшIу ашIы.

Урысыем самбэмкIэ изэнэ­къокъоу Новороссийскэ щыкIуагъэм илъэс 15 — 16 зыныбжьыхэр щызэIукIагъэх. Районым испорт еджапIэу N 1-м зыщызыгъэсэрэ Нащ Расул, кг 55-рэ, тыжьыныр къыдихыгъ. Кобл Рэ­мэзан, кг 46-рэ, джэрзыр къыфагъэшъошагъ. Адыгэ Респуб­ликэм изаслуженнэ тренерэу Джарымэкъо Рустам бэнакIохэр егъасэх.

Дунаим иныбжьыкIэхэм самбэмкIэ язэIукIэгъухэу Ташкент щыкIуагъэхэм ЛIыIужъу Азмэт тыжьыныр къыщыдихыгъ. Нарт шъаор зыгъэсэрэ тренерэу Джарымэкъо Рустам къызэрэтиIуагъэу, ЛIыIужъу Азмэт дышъэм пэ­блэгъагъ, ау кIэух бэнэгъум икъулайныгъэ икъоу щигъэфе- дэн ылъэкIыгъэп.

Урысыем истудентхэм яфе­сти­валэу Москва щыкIуагъэм рай­оным испорт еджапIэу N 1-м зыщызыгъэсэрэ ЦIыкIу Рэмэзан, кг 62-рэ, дышъэр къыщихьыгъ, тренерыр Р. Джарымэкъу.

Тэхъутэмыкъое районым иадминистрацие физкультурэмкIэ ыкIи спортымкIэ и Комитет итхьа­матэу Джарымэкъо Азмэт спорт лъэпкъ зэфэшъхьафхэм ныб­жьыкIэхэм зыфагъасэзэ, районым, Адыгэ Республикэм щытхъур къафахьы, спортым ипIуныгъэ мэхьанэ зыкъеIэты.

ЕмтIылъ Нурбый.