Мэкъуогъум и 1-р кIэлэцIыкIухэм якъэухъумэн и Дунэе маф
ЩыIэныгъэр къызщежьэрэр сабыир ары
Сыд фэдэрэ лъэхъани анахь мэхьанэ зэратырэр сабыир ары. Унагъом къихъорэ сабыим насыпыр къыдакIоу адыгэхэм алъытэ. КIэлэцIыкIур щыIэныгъэм зэрилъапсэр къыушыхьатэу, ащ инасыпи игушIуагъуи унагъом къырехьэх.
Сабыйхэм ящыIэныгъэ нахь дэгъу шIыгъэныр, чIыпIэ къинхэм арымыфэнхэр, гумэкIыгъохэм ащыухъумэгъэнхэр нахьыжъхэм япшъэрылъ шъхьаIэхэм ащыщ. КIэлэцIыкIухэм зэрифэшъуашэу шIэныгъэ агъотыныр, ахэм цIыфыныгъэ, гукIэгъуныгъэ ахэлъэу къэтэджынхэр зыIэ илъыр нахьыжъхэр ары.
КIэлэцIыкIухэм ядунае мамырэу, гумэкIыгъохэр ямыIэу къэтэджынхэм къэралыгъори, тиреспублики чанэу дэлажьэх. Сабыибэ зэрыс унагъохэм IэпыIэ- гъу афэхъух, сэкъатныгъэ зиIэ кIэлэцIыкIухэр зыпIухэрэр, чIыпIэ къин ифэгъэ унагъохэр янэплъэгъу рагъэкIыхэрэп.
Коронавирусым тикъэралыгъо зызщиушъомбгъурэ уахътэм кIэлэцIыкIухэм яIофыгъохэр УФ-м и Президент къыдилъы-тагъ. Ащ игукъэкIыкIэ къэралыгъо IэпыIэгъу ахэм афэкIонэу ыгъэнэфагъ. Илъэси 3-м къыщегъэжьагъэу 15-м нэс зыныбжь кIэлэцIыкIу пэпчъ зэтыгъоу сомэ мини 10 къаратыщт. Мыщ дэжьым унагъом ихахъуи, ны-тыхэм IофшIэпIэ чIыпIэ яIэми мэхьанэ иIэп. Унашъоу щыIэмкIэ мы купым къыхиубытэхэрэм зэкIэми ахъщэр аратыщт. Къыхэтэгъэщы мы IэпыIэгъум нэмыкI тынхэр зэрэтыримыхыжьыхэрэр.
Илъэси 3-м нэс зыныбжь сабыйхэм сомэ мини 5 зырыз афэкIощт. Мы тыным хэфэщтых ны мылъкур къызтемыфэхэрэ, ау 2017-рэ илъэсым мэлылъфэгъу мазэм и 1-м щегъэжьагъэу 2020-рэ илъэсым щылэ мазэм и 1-м нэс апэрэ сабый къызфэхъугъэхэ е зыпIунэу зыштэгъэхэ унагъохэр.
2020-рэ илъэсым гъэтхапэм и 1-м щегъэжьагъэу ны-тыхэм е ахэм ащыщ зы нэбгырэм IофшIэпIэ чIыпIэр чIинагъэ зыхъукIэ, зыныбжь имыкъугъэ сабый пэпчъ сомэ мини 3 зырыз аратыщт.
КIэлэцIыкIухэм якъэухъумэн и Дунэе мафэ тиреспубликэ мэхьанэшхо зэритырэ мэфэкIхэм ащыщ. Тинеущырэ мафэ зэлъытыгъэ сабыйхэр чэфынхэм фэшI къэгъэлъэгъон зэфэшъхьафхэр Мыекъуапэ щызэхащэхэ зэпыты. Мыгъэ гумэкIыгъоу къэуцугъэм ыпкъ къикIыкIэ цIыфыбэ зыщызэрэугъоищт Iофтхьабзэхэр рагъэкIокIыщтхэп. Ау щыIэныгъэм ылъэпсэ сабыйхэм ямэфэкI унагъо пэпчъ ежь зэрэфаеу хигъэунэфыкIын амал иI.
Гъонэжьыкъо Сэтэнай.