Адыгэ Республикэм и ЛIышъхьэу КъумпIыл Мурат тыгъуасэ зэхищэгъэ зэхэсыгъом непэ щыIэ режимым зытекIыжьыхэрэ нэуж псэупIэхэм яшIын ыкIи гумэкIыгъо зыдэщыIэ мыщ фэдэ объектхэм ягъэпсын лъыгъэкIотэгъэным иIофыгъо щытегущыIагъэх.

Iофтхьабзэм хэлэжьагъэх Адыгеим и Премьер-министрэу Александр Наролиныр, вице-­премьерэу Сапый Вячеслав, АР-м и ЛIышъхьэрэ минист­рэхэм я Кабинетрэ я Адми­нистрацие ипащэ игуадзэу Хъоткъо Саниет, республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ игуадзэу Лафышъэ Рэ­мэзан.

Iофыгъо шъхьаIэу зэхэсыгъом къыщаIэтыгъэр унэу ашIы­хэрэм зимылъку хэзылъхьэ­хэрэм яфитыныгъэхэр ухъумэгъэнхэр ары. Анахьэу зигугъу ашIыгъэр гумэкIыгъо къызпыкIы­гъэ псэупIэ комплексэу «Тур­геневский-2» зыфиIоу къуа­джэу АдыгеякIэм щашIырэр ары. Ащ къыхэкIыкIэ зэдэгущыIэгъум къыхагъэлэжьагъэх мы объектым ишIын зиахъщэ хэзылъхьэгъэ цIыфхэр.

Адыгеим и ЛIышъхьэ къызэриIуагъэмкIэ, фэтэрыбэу зэхэт унэхэм яшIын зимылъку хэ­зылъхьагъэхэу агъэпцIагъэхэм зэкI пIоми хъунэу ягумэкIыгъо­хэр дагъэзыжьынхэ афызэшIо­кIыгъ. Джы непэрэ мафэм анахь шъхьаIэу щытыр агъэпцIэгъэ пай­щик 510-мэ яIофыгъохэр зэхэфыгъэнхэр ары.

Мыщ епхыгъэу республикэм ипащэ цIыфыбэхэм зыкъыфа­гъэзагъ. Iофхэм язытет зэри­гъашIэмэ шIоигъоу КъумпIыл Мурат Тэхъутэмыкъое районым щыIагъ. ЦIыфхэм IэпыIэгъу афэхъугъэным фытегъэ­псыхьагъэу муниципалитетым ыкIи профильнэ ведомствэм пшъэрылъ гъэнэфагъэхэр афи­шIыгъэх.

Тыгъосэрэ зэхэсыгъом а Iофыгъоми къыфагъэзэжьыгъ. Мы лъэныкъомкIэ республикэм ихэбзэ къулыкъухэм ашIагъэм, Iофхэм язытет зыфэдэм рес­публикэм ипащэ къащыуцугъ, непэ режимэу зытетхэм зыте­кIыжьхэкIэ псэолъэшIыныр нахь агъэлъэшынымкIэ пшъэрылъхэр къыгъэуцугъэх.

— Амал зэфэшъхьафхэр, ащ хэхьэ социальнэ хъытыур, къыз­фагъэфедэзэ зыкъысфэзыгъа­зэхэрэм яIофыгъохэм салъэплъэ. Хэбзэгъэуцугъэм диштэу гумэкIыгъо зиIэ цIыфхэм Iэпы­Iэгъу тафэхъуныр ары пшъэрылъ шъхьаIэу зыфэдгъэуцужьырэр. IофшIэнэу дгъэцакIэрэм ишIуагъэкIэ непэ тызытегущы­Iэрэ гумэкIыгъор дэгъэзыжьыгъэ хъунэу ригъэжьагъ. Режимэу тызытетым игъорыгъоу тызытекIыжьыкIэ мы IофшIэныр джыри нахь дгъэлъэшын фае. Илъэсым ыкIэм нэс цIыфхэр зэжэхэрэ фэтэрхэм яIункIы­бзэхэр къаIэкIэхьанхэ фае. Мыщ дэжьым ежь цIыфхэми ячIы­фэхэр къапщынынхэм, зэзэ­гъыныгъэу адашIыгъэм елъытыгъэу ахъщэр игъом къатIупщыным мэхьанэшхо иI, — къыIуагъ КъумпIыл Мурат.

Iофхэм язытет къин нахь мышIэми, гъогу картэм диштэу псэупIэ комплексэу «Турге­невский-2» зыфиIорэр бэшIагъэу зэрашIырэм игумэкIыгъо республикэм ипащэхэм дагъэзыжьын алъэкIыгъ. Хэбзэгъэуцугъэу щыIэм диштэу IофшIэнхэр зэхащагъэх, псэолъэшI организациякIэ къагъотыгъ. Джы объектым ишIын ежь имылъкукIэ лъызыгъэкIуатэрэр пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвард» зыфиIорэр ары.

Фэтэрыбэу зэхэт унэхэм яшIын ухыжьыгъэным фэшI ащ зимылъку хэлъхэм подряднэ организацием зэзэгъыныгъэ дашIын фае. Ар зэшIохыгъэ зэрэхъущтыр цIыфхэм къафа­Iотагъ. ЫпэкIэ мы объектыр зыгъэпсыщтыгъэ ЕмтIылъ Ас­кэрбый банкротэу алъытагъ, джы ащ имылъку ащэнэу ары.

Финанс гъэIорышIакIом къызэриIуагъэмкIэ, объектыр ухы­жьыгъэным сомэ миллиони 142,8-рэ пэIухьащт. ЗэкIэмкIи амыухыжьыгъэ уни 9 щыI. Ахэр зэфэшъхьафэу хьазырых — процент 38-м щегъэжьагъэу 99-м нэс. Непэрэ мафэм ехъу­лIэу псэуалъэхэм ащыщхэм IофшIэнхэр ащарагъэжьагъэх. Подряднэ организацием зэ­ригъэнэфагъэмкIэ, илъэсэу ты­зыхэтым ишэкIогъу мазэ ехъу­лIэу объектиплIымэ псэолъэшI IофшIэнхэр ащаухынхэу, ащ къапэIулъ чIыпIэхэр зэтырагъэ­псыхьанхэу ары. Нэужым адрэ къанэхэрэри аухыжьыщтых.

— Мы Iофыгъом екIолIакIэу къыфэдгъотыгъэм ишIуа­гъэкIэ гумэкIыгъор зэшIохыгъэ хъущт. Хэбзэ къулыкъухэм, профильнэ ведомствэм, муниципалитетым яIо зэхэлъэу зэдэ­­лэжьэнхэм мыщ дэжьым мэ­­хьанэшхо иI, — къыхигъэщыгъ КъумпIыл Мурат.

АР-м и ЛIышъхьэ ипресс-къулыкъу.