Гъогу хъызмэтым хэхъоныгъэ ышIынымкIэ анахьэу анаIэ зытырагъэтын фэе Iофыгъохэм защытегущыIэгъэхэ видеоселектор зэхэсыгъоу щыIагъэм тхьамэтагъор щызэрихьагъ Адыгеим и ЛIышъхьэу КъумпIыл Мурат.

Лъэпкъ проектхэм ыкIи къэралыгъо программэхэм къады­хэлъытэгъэ гъогу проектхэр шъо­лъырым щыгъэцэкIагъэхэ зэрэхъурэм къытегущыIагъэх АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевыр, «Адыгеяавтодорым» ипащэу Алексей Корешкиныр, Мыекъуапэ имэрэу Андрей Гетмановыр.

«Адыгеяавтодорым» ипащэ­хэм къызэраIуагъэмкIэ, 2020-рэ илъэсым Адыгеим и Гъогу фонд ибюджет сомэ миллиарди 3,7-м ехъу. А мылъкумкIэ Iофтхьэбзэ 12 агъэцэкIэнэу агъэнафэ. Ана­хьэу ахъщэр зыпэIуагъэхьащтыр республикэ мэхьанэ зиIэ гъогухэм яIыгъын, ягъэцэкIэжьын, яшIын ыкIи ягъэкIэжьын ары. Джащ фэдэу сурэт ыкIи видео тезыхырэ пкъыгъохэм ягъэуцун лъагъэкIотэщт, нэмыкIыбэ зэшIуахыщт. ЧIыпIэ мэхьанэ зиIэ гъогухэр гъэцэкIэжьыгъэнхэм фэшI Мыекъуапэ, Адыгэкъалэ, Инэм ыкIи Яблоновскэ къэлэ псэупIэхэм субсидиехэр афатIупщыщтых. Ащ нэмыкIэу лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм игъэцэкIэн пэIухьащт сомэ мил­лион 475-м ехъу фондым ибюджет шъхьафэу къыдыхэ­лъытагъ.

Гъогу хъызмэтым хэхъоныгъэ ышIыным мэхьанэшхо зэриIэр, ащкIэ пшъэрылъхэр зэкIэ зэшIохыгъэнхэ зэрэфаер респуб­ликэм ипащэ хигъэунэфыкIыгъ.

— Мы лъэныкъомкIэ проектышхохэр дгъэцэкIэнхэу щыт, экономикэм хэхъоныгъэ ышIыным ахэр фэIорышIэщтых. Гу­хэлъхэр щыIэныгъэм щыпхы­рыщыгъэнхэм ыкIи къэкIорэ илъэсым илимитхэм ягъэфедэн тыфежьэным афэшI проектхэр игъом дгъэхьазырынхэм мэхьанэшхо иI. Ащ дакIоу къэралыгъо зэзэгъыныгъэу тшIыгъэ­хэмкIэ пшъэдэкIыжьэу тхьырэр къыдгурыIозэ шIуагъэ къытэу IофшIэныр зэхэтщэным тынаIэ тедгъэтын фае, — къыIуагъ КъумпIыл Мурат.

Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэр зэрагъэцакIэрэм Ва­лерий Картамышевыр къытегущыIэзэ, мы илъэсым республикэ гъогу километрэ 35,8-рэ ыкIи чIыпIэ мэхьанэ зиIэ гъогу километрэ 11,4-рэ зэрагъэцэкIэ­жьыгъэхэр, нэмыкI пшъэрылъхэр зэрэзэшIуахыгъэхэр къыхигъэщыгъ. Непэрэ мафэм ехъулIэу мы лъэпкъ проектымкIэ зэзэгъыныгъэр процент 96-кIэ гъэцэкIагъэ зэрэхъугъэр къыIуагъ. Мылъкоу къызэтырагъэнагъэм ишIуагъэкIэ джыри псэолъи 2 агъэцэкIэжьын амал щыIэ хъугъэ. 2020-рэ илъэсым шы­шъхьэIум и 1-м ехъулIэу Iоф­шIэнхэр зэкIэ аухыщтых.

Мыекъуапэ къэзыухьэрэ автомобиль гъогум ишIын (я 2-рэ уцугъор) зэрэлъыкIуатэрэм иIо­фыгъуи зэхэсыгъом къыщаIэ­тыгъ. Алексей Корешкиным къызэриIуагъэмкIэ, лъэмыдж псэолъищыр къыдыхэлъытагъэу ащ икIыхьагъэ километри 10,4-рэ мэхъу. Проектым игъэцэкIэн сомэ миллиарди 3,1-рэ пэIуагъэхьанэу агъэнафэ. Непэрэ мафэм ехъулIэу мыщ епхыгъэ IофшIэнхэр лъагъэкIуатэх.

Километрэ 17,08-рэ зэрылъ автомобиль гъогоу «Гъозэрыплъ — Лэгъо-Накъэ» зыфиIорэр зы­нагъэсыгъэм иIофыгъуи зэ­хэсыгъом къыщаIэтыгъ. 2018-рэ илъэсым щегъэжьагъэу километри 9,8-рэ ашIыгъ, мы илъэ­сым­кIэ зэзэгъыныгъэу щыIэм диштэу джыри километри 3,35-рэ (асфальт темылъэу) агъэ­псыщт.

АР-м и ЛIышъхьэ ипресс-къулыкъу