Сабый къызыфэхъугъэм коронавирус иIэу къыхагъэщыгъ
Мыекъопэ къэлэ сымэджэщым иперинатальнэ гупчэ иотделение сабый къызыфэхъунэу къычIэфэгъэ бзылъфыгъэхэм ащыщым COVID-19-р къыхагъэщыгъ.
Мыр Краснодар краим къикIи, сымэджэщым жъоныгъуакIэм и 26-м къычIэфагъ, ыIыгъыгъэ тхьапэхэм узыр имыIэу арытхэгъагъ.
Отделением чIагъэгъуалъхьэ зэхъум анализ хахыгъ, ятIонэрэ мафэм узыр иIэу къыгъэлъэгъуагъ.
Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, псынкIэу бзылъфыгъэр шъхьафы ашIыгъ, зыпкъ итэу сабыир къэхъугъ. Ар зыщыпсэурэм агъэкIожьыгъ, амбулаторнэ шIыкIэм тетэу еIэзэщтых.
Сабыйхэр къызыщыхъухэрэ отделением чIэлъыгъэхэм зэкIэми уплъэкIунхэр арашIылIагъэх, COVID-19-р яIэу агъэунэфыгъэп. А мафэм Iоф зышIагъэхэу сымаджэм кIэрыхьагъэхэм узыр яIэу къахагъэщыгъэп, арэу щыт нахь мышIэми, яунэхэм мэфэ 14 арысынхэу агъэтIысыгъэх.
«Роспотребнадзорыр» ягъусэу эпидемием пэшIуекIорэ Iофтхьабзэхэр отделением щызэрахьагъэх. Мы уахътэм зытетыгъэм тетэу учреждением иIофшIэн пидзэжьыгъ. ГумэкIыгъо щымыIэу ведомствэм къыщаIуагъ.
Iэшъынэ Сусан.