Гъогухэм щынэгъончъэу ащызекIонхэм епхыгъэ Iофыгъохэр респуб­ликэм ипащэхэм янэплъэгъу рагъэкIыхэрэп. АР-м и Премьер-минист­рэ игуадзэу Наталья Широковам зэрищэгъэ зэхэсыгъом мы Iофы­гъом изэшIохын щытегущыIагъэх.

«Адыгеяавтодорым» ипащэу А. Корешкиным щынэгъончъэным исистемэхэмкIэ шъолъыр гъогухэр зэтегъэпсыхьэгъэнхэм фэшI 2020-рэ илъэсым амал тедзэу агъэфедэщтхэм ыкIи ащкIэ пшъэдэкIыжьэу ахьыщтым зэхэсыгъом къыщытегущыIагъ.

ЩынэгъончъэнымкIэ мэхьа­нэшхо зиIэ Iофыгъохэм ащыщ чэщырэ гъогухэр зэрифэшъуа­шэу къэгъэнэфыгъэнхэр. Рес­публикэм ипсэупIэхэм янахьыбэм апхырыкIырэ шъолъыр мэ­хьанэ зиIэ гъогухэр гупчэу е урам шъхьаIэу щытых. Ащ социальнэ псэолъабэхэр атетых, лъэсрыкIохэр бэу ащэзекIох. Арышъ, ахэр зэрэзэтегъэпсы­хьагъэхэм щынэгъончъэнымкIэ мэхьанэшхо иI.

Мы илъэсым урамэу (гъогоу) къагъэнэфыщтхэр километрэ 36-кIэ шъолъырым нахьыбэ щыхъущт. Непэрэ мафэм ехъу­лIэу подряднэ организациехэм Iоф ащашIэ Джэджэ ыкIи Шэуджэн районхэм ягъогухэм ащыщхэм, чэзыум щытых Мые­къопэ, Тэхъутэмыкъое, Теуцожь районхэр.

Гъонэжьыкъо Сэтэнай.