Чэщ-зымафэм къыкIоцI Адыгеим щыщ нэбгыри 4-мэ сомэ мин 500-м ехъу гъэпцIакIохэм ашIуатыгъугъ.

Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм идежурнэ часть тикъэлэ шъхьаIэ щыпсэурэ илъэс 59-рэ зыныбжь хъулъфыгъэм зыфигъэ­загъ ыкIи имылъку зэрэшIуатыгъугъэр ащ ариIуагъ.

Полицием иIофышIэхэм зэрагъэунэфыгъэмкIэ, хъу­лъфыгъэм имынэIосэ горэ къыфытеуи, хэбзэу­хъу­мэкIо къулыкъум иIофышIэу ышIошъ ыгъэхъугъ. Ащ икIалэ бзэджэшIагъэ зэрихьагъэу зэрегуцафэ­хэрэм къыхэкIэу аубытыгъэу къыриIуагъ, ау уголовнэ Iоф къыпамыгъэтэджэнымкIэ IэпыIэгъу къыфэхъун ылъэкIынэу гуригъэIуагъ. Ащ пае хъу­лъфыгъэм къыраIогъэ но­мерым сомэ мин 300 ригъэхьагъ. Нэужым, икIа­лэ зыфытеом, къыгуры­Iуагъ ар зэрагъэпцIагъэр.

Джащ фэдэу мы шIыкIэмкIэ илъэс 26-рэ зыныбжь кIалэу Мыекъуапэ щыпсэурэр бзэджашIэхэм агъэделагъ. Банкым иномерым фэдэу 8-495…-кIэ къыригъажьэрэмкIэ гъэпцIакIор къыфытеуи, иахъщэ щынэгъончъэу щытынымкIэ нэмыкI банкым икартэ рилъхьан фаеу къы­риIуагъ. Къэбарым лъэ­псэ шъыпкъэу иIэр зэ­римыгъашIэу сомэ мини 170-рэ гъэпцIа­кIом исчет фыригъэхьагъ.

Джащ фэдэу Интернетым иамалхэр къызфагъэ­федэхэзэ зэрахьэрэ бзэ­джэшIагъэхэм япчъагъэ къыщыкIэрэп. Мыекъуапэ щыпсэурэ бзылъфыгъэу илъэс 54-рэ зыныбжьым полицием зыкъыфигъэ­загъ. Ащ къулыкъушIэхэм къазэрафиIотагъэмкIэ, сайт­хэм ащыщ горэм мобильнэ телефоныр зэрищэрэм епхыгъэ къэбарыр къыригъэхьагъ. Нэужым ымышIэрэ горэ къыфы­теуи, телефоныр ыщэфы­нэу зэрэфаер ыкIи пэшIорыгъэшъэу ыуасэм ызыныкъор икартэ къыфы­ригъэхьанэу къыриIуагъ. Бзылъфыгъэм ар ышIошъ хъуи, икартэ иномерхэр ариIуагъэх, ащ илъыгъэ сомэ мин 35-р гъэпцIакIом рихыгъ.

Мы мафэхэм гъэпцIагъэ зыхэлъ бзэджэшIагъэу зэ­рахьагъэхэмкIэ уплъэ­кIун Iофтхьабзэхэр зэхащэх, лъыхъуакIохэр бзэджашIэ­хэм якъычIэгъэщын ыуж итых. Полицием икъулыкъушIэ­хэм джыри зэ шъугу къа­гъэкIыжьы, мыщ фэдэ гъэпцIагъэ зыхэлъ хъу­гъэ-шIагъэхэм шъуахэмыфэнхэм фэшI, шъумышIэрэ цIыфхэм шъуадэмыгущыI, цыхьэ афэшъумышI, шъуи­картэ иномер, пчъагъэхэр яшъумыIох.