Межведомственнэ пэшIорыгъэшъ операциеу «Iушъхьэ-­2020» зыфиIорэм къыдыхэлъытагъэу хэбзэнчъэу нарко­тикхэр къырагъэкIокIхэу гъогогъуибгъурэ агъэунэфыгъ.

БэмышIэу Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм наркотикхэр къезыгъэкIокIы­хэрэм апэшIуекIогъэным фэгъэзэгъэ подразделением иIофышIэхэм ыпэкIэ хьапс зытелъыгъэ кIалэу илъэс 22-рэ зыныбжьым наркотикхэр ыгъэфедэхэу егуцэфагъэх. КIалэр къызалъыхъухьэм, наркотик лъэпкъэу «соль» зыфиIорэ щыхьагъэр къыкъуа­гъотагъ.

Тэхъутэмыкъое районым икъулыкъушIэхэм ыпэкIэ хьапс зытелъыгъэ илъэс 44-рэ зыныбжь хъулъфыгъэу Краснодар щыпсэурэр къаубытыгъ. Наркотикыр зыщагъэбы­лъырэ гъэтIылъыпIэм къы­щызIэкIигъэхьагъэу наркотик щыхьагъэр ащ къыкъуахыгъ.

Мыщ ыпэкIэ Краснодар краим щыпсэурэ хъу­лъфыгъэу илъэс 37-рэ зыныбжьым наркотик зы­хэлъ пкъыгъор къыпкъырахыгъ. Республикэм ирай­он гупчэ анахь инхэм ащыщ горэм хъулъфыгъэр къыщаубытыгъ.

Iофтхьабзэу «Iушъхьэ-­2020» зыфиIорэм ха­хьэу Джэджэ районым икъулыкъушIэхэм бзэджа­шIэр къаубытыгъ. Илъэс 57-рэ зыныбжь хъулъ­фыгъэу мы районым щы­псэурэм «марихуанэр» къыкъуагъотагъ. Зэрагъэ­унэфыгъэмкIэ, наркотик лъэпкъым ихьылъагъэ грамм 20 мэхъу. Хъулъфы­гъэм уголовнэ Iоф къыфызэIуахыгъ.

Адыгеим иполицие шъу­гу къегъэкIыжьы, Урысыем и Уголовнэ Кодекс истатья къызэригъэна­фэ­рэмкIэ, хэбзэнчъэу наркотикыр къезыгъэкIокIыхэу къаубытыгъэхэм илъэ­си 3-м нэс хьапс къахьын алъэкIыщт.