Зэпахырэ узэу COVID-19-м зимыушъомбгъуным пае режим гъэнэфагъэу Адыгеир зытехьэгъагъэм къытекIыжьынэу ригъэжьагъ.

Ащ фэдэ унашъор АР-м и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъоу оперативнэ штабым иIагъэм щаштагъ. Федеральнэ Гупчэм къызэригъэнэфагъэм тетэу, режимым уцугъуищыкIэ субъектыр къытекIыжьыщт. Мыщ дэжьым зэпахырэ узым зызэриушъомбгъурэм икоэф­фициент, къызэолIагъэхэм зыщяIазэхэрэ сымэджэщхэм чIы­пIэ пчъагъэу яIэр ыкIи цIыфэу ауплъэкIушъурэр зыфэ­дизыр къыщыдалъытэн фае.

— Iофхэм язытет къызэр­и­гъэлъагъорэмкIэ, апэрэ уцугъор республикэм щедгъэжьэн тлъэкIынэу щыт. Лъэбэкъоу ты­дзырэ пэпчъ Роспотребнад­зорыр щытэгъэгъуазэ, къызэ­рэтиIоу тэпсэу. Апэрэ уцугъор пхырытщэу, ащ ыужым Iофхэр зэрэхъухэрэм тыхаплъэмэ, ятIонэрэ ыкIи ящэнэрэ уцугъохэм татехьащтмэ къыдгурыIощт, — къыIуагъ КъумпIыл Мурат.

Оперативнэ штабым зэрэрихъухьагъэмкIэ, апэрэ уцугъом къыдыхэлъытагъэу парикмахерскэхэм, косметическэ салонхэм, нэмыкIэу цIыфхэм яфэIо-фашIэхэр афэзгъэцакIэхэрэм, мыгъомылэпхъэ товар IузгъэкIырэ щапIэхэм ащыщхэм яIоф­шIэн рагъэжьэжьын алъэкIыщт. Ащ фэдэ фитыныгъэ зиIэхэмрэ шапхъэу ахэм агъэцэкIэн фаехэмрэ Роспотребнадзорым къыгъэнэфагъ.

Ахэм анэмыкIэу муници­пальнэ образованиехэр зэзыпхырэ маршрутхэм атет общественнэ транспортэу, ежь муниципалитет кIоцIхэм къаще­кIокIэу АР-м псэолъэшIынымкIэ, транспортымкIэ, псэупIэ-­коммунальнэ ыкIи гъогу хъыз­мэтымкIэ и Ми­нистерствэ иуна­шъо къыхиубытэхэрэми яIоф­шIэн падзэжьын фитых. Ау мы­хэми санитарнэ шэпхъэ гъэ­нэфагъэхэр агъэцэкIэнхэ фае.

АР-м и ЛIышъхьэ хъызмэтшIапIэхэр, организациехэр, щапIэхэр, нэмыкIэу зиIофшIэн езгъэжьэжьыхэрэр шапхъэхэм зэрапылъхэм, Iофхэр нахь дэи мэхъужьынхэм алъыплъэгъэныр шIокI зимыIэ Iофэу зэрэщытым къыкIигъэтхъыгъ.

ХЪУТ Нэфсэт.