Коронавирусым зимыушъомбгъунымкIэ шэпхъэ гъэнэфагъэхэм непэ зарыгъозэхэрэ лъэхъаным Адыгэ Республикэм и ЛIышъхьэу, партиеу «Единэ Россием» и Адыгэ регион къутамэ и Секретарэу КъумпIыл Мурат пшъэрылъ зэрафишIыгъэм тетэу гъот макIэ зиIэхэм апае зи­чэзыу шIушIэ Iофтхьабзэ Адыгеим щызэрахьэ.

Ыпэрэхэм афэдэу ящэнэрэ Iофтхьабзэм изэхэщэни кIэщакIо фэхъугъэр Урысые партиеу «Единэ Россием» и Адыгэ регион къутам ары.

Мы Iофтхьабзэм къыдыхэ­лъытагъэу бюджетхэм къахэ­мыкIыгъэ мылъкумкIэ гъомы­лапхъэхэр зэрылъ Iалъмэкъ мин 20 фэдиз агъэхьазырыгъ. Гъот макIэ зиIэ унагъохэм, зэпахырэ узым чIыпIэ зэжъу ригъэуцуагъэхэм ахэр афагощых.

Адыгеим и ЛIышъхьэ пшъэ­рылъ афишIыгъ IэпыIэгъу зищыкIагъэхэр зэкIэ амал зэриIэкIэ шIушIэ Iофтхьабзэм къыхыра­гъэубытэнхэу. Зэфагъэ хэлъэу Iалъмэкъхэр агощыным мэхьа­нэшхо зэриIэр КъумпIыл Мурат хигъэунэфыкIыгъ. Джащ пае апэрэ чэзыоу IэпыIэгъу зыфэ­хъущтхэр гъот макIэ зиIэхэмрэ щыIэныгъэм чIыпIэ къин ригъэу­цуагъэхэмрэ ары. IэпыIэгъум фэныкъохэр ямуниципалитетхэм «линие плъырымкIэ» ятелефонхэм атеонхэ е Урысые партиеу «Единэ Россием» и Адыгэ регион къутамэ зыфагъэзэн фае.

Партием ипэублэ къутамэхэм къызэратыгъэмкIэ, джыдэдэм «Единэ Россием» иволонтерхэм гъомылапхъэхэр зэрылъ Iалъмэкъхэр районхэм ащагъэхьа­зырых. Адыгэ Республикэм и ЛIышъхьэ ипресс-къулыкъу къы­зэриты­гъэм­кIэ, IэпыIэгъу зищыкIагъэхэм ахэр аIэкIагъэхьащтых.