Адыгэ Республикэм щыпсэухэу лъытэныгъэ зыфэсшIыхэрэр!
Ныбджэгъу лъапIэхэр!
Адыгэ тхэкIо цIэрыIоу, Урысые Федерацием IофшIэнымкIэ и ЛIыхъужъэу МэщбэшIэ Исхьакъ Шумафэ ыкъом ыныбжь илъэс 90-рэ зэрэхъурэр непэ хегъэунэфыкIы.
Адыгэ Республикэм, Къэбэртэе-Бэлъкъарым, Къэрэщэе-Щэрджэсым янароднэ тхакIоу, Пшызэ шъолъыр искусствэхэмкIэ изаслуженнэ IофышIэшхоу, СССР-м, Урысыем, Адыгеим якъэралыгъо шIухьафтынхэм, М. Шолоховым ыцIэкIэ щыт литературнэ шIухьафтыным ялауреатэу, Адыгэ Республикэм и Къэралыгъо гимн зытхыгъэу МэщбэшIэ Исхьакъ Шумафэ ыкъом икъэлэмыпэ адыгэ лъэпкъ литературэм иклассикэ хъугъэ, тиреспубликэ икультурэ къэзыгъэбаигъэ тхыгъабэ къыпыкIыгъ.
МэщбэшIэ Исхьакъ иусэхэм, ипоэмэхэм, лIэшIэгъу пчъагъэхэм къакIоцI адыгэхэм япсэукIагъэ къызыщигъэлъэгъукIыгъэ ироман хьалэмэтхэм адыгэ литературэр хэпшIыкIэу къызэрагъэбаигъэм къегъэлъагъо ар зэчыишIоу, лэжьэкIошхоу зэрэщытыр.
Литературнэ, общественнэ IофшIэнхэр гъэхъагъэ хэлъэу зэдигъэцакIэхэзэ, организацие, объединение зэфэшъхьафхэм чанэу пэщэныгъэ адызэрихьэзэ, Урысые Федерацием и Общественнэ палатэ хэт МэщбэшIэ Исхьакъ лъэпкъхэм язэгурыIоныгъэрэ патриотизмэмрэ ягъэпытэн, цIыфхэм уасэ зыфашIырэ шIуагъэхэм якъэухъумэн иIахьышIу ахешIыхьэ.
Июбилей зыщыхигъэунэфыкIырэм ехъулIэу МэщбэшIэ Исхьакъ псауныгъэ пытэ иIэнэу, игъашIэ кIыхьэ хъунэу, творческэ гъэхъэгъакIэхэр ышIынэу фэсэIо! МэфакIэ пэпчъ гупшысэ куухэмрэ амалыкIэхэмрэ къыпферэхь!
Адыгэ Республикэм и ЛIышъхьэу КъумпIыл Мурат