Адыгеим и ЛIышъхьэу КъумпIыл Мурат Мыекъуапэ исатыушIыпIэ сетьхэм санитарнэ ыкIи эпидемием пэшIуекIорэ шапхъэхэр зэрагъэцакIэхэрэр тыгъуасэ ыуплъэкIугъ. Республикэм ипащэ игъусагъэх АР-м экономикэ хэхъоныгъэмкIэ ыкIи сатыумкIэ иминистрэу Геннадий Митрофановымрэ шъолъырым икъэлэ шъхьаIэ имэрэу Андрей Гетмановымрэ.

Оперативнэ штабым унашъоу ышIыгъэм ыкIи Адыгеим и ЛIышъхьэ и Указхэм къадыхэлъытагъэу сатыушIыпIэ объектхэм яIофшIэн зэрэзэха­щэщтхэ, джащ фэдэу цIыф­хэр къызэраухъумэщтхэ шап­хъэхэр агъэнэфагъэх. ГущыIэм пае, товархэр зыщызэрагъэгъотырэ ыкIи фэIо-фашIэхэр зыщагъэцэкIэрэ чIыпIэхэу зиIоф­шIэн къызэтырамыгъэу­цуагъэхэм яолIэрэ цIыфхэм социальнэ зэпэчыжьагъэр аIыгъын, маскэхэр ыкIи Iалъэхэр агъэфедэнхэ фае.

Санитарнэ шапхъэхэр зэкIэ гъэцэкIэгъэнхэм мэ­хьанэшхо зэриIэр Адыгеим и ЛIышъхьэ къыхигъэщыгъ. ЦIыфхэм ащ зыщадзые зыхъукIэ зэпахырэ узым зиушъомбгъуным ищынагъо къызэрэуцурэр, ащ фэдэ къэхъу зэрэмыхъущтыр хигъэунэфыкIыгъэх.

— Шапхъэхэр зыукъо­хэрэм ежьхэм ямызакъоу, къэзыуцухьэхэрэ цIыфхэми япсауныгъэ зэщагъэ­къон алъэкIыщт. Коро­навирусыр къапыхьаным ищынагъо джыри ины, арышъ, нэбгырэ пэпчъ пшъэдэкIыжь зэрихьырэр къагурыIон, тэрэзэу зекIон фае. Джащыгъум эпидемиер къызэтынэ­кIыщт, ыпэкIэ щыIэгъэ щыIэкIэ-псэукIэм тытехьа­жьыщт, — къыхигъэщыгъ КъумпIыл Мурат.

Предприятиехэр ыкIи организациехэр щынэ­гъончъэу лэжьэнхэм иIофыгъо щытегущыIагъэх Оперативнэ штабым изэ­хэсыгъо.