Коронавирусым зимыушъомбгъунымкIэ Оперативнэ штабым изэхэ­сыгъоу иIагъэр зэрищагъ Адыгеим и ЛIышъхьэу КъумпIыл Мурат.

Бирам мэфэкIым илъэхъан цIыфхэр яунэхэм зэрисыгъэхэр, шапхъэхэр зэрагъэцэкIагъэхэр республикэм ипащэ игуапэу къыхигъэщыгъ, мы лъэныкъом епхыгъэ IофшIэным фэгъэзэ­гъагъэхэм зэкIэми тхьашъуе­гъэпсэу къариIуагъ. Ащ дакIоу санитарнэ-эпидемиологическэ шапхъэхэр зыукъохэрэ предприятиехэм ыкIи организациехэм административнэ пшъэдэкIыжьэу арагъэхьырэр нахь гъэлъэшыгъэн фаеу ылъытагъ.

— Санитарнэ къулыкъум къыгъэнэфэрэ шапхъэхэр гъэ­цэ­кIэгъэнхэм епхыгъэ IофшIэныр муниципалитетхэм ренэу ащызэхащэн фае. Анахьэу ар зыфэгъэхьыгъэр сатыушIыпIэ предприятиехэр арых, — къы­Iуагъ КъумпIыл Мурат.

Республикэм икъэралыгъо санитар врач шъхьаIэу Сергей Завгороднем къызэриIуагъэмкIэ, режимэу щыIэм игъорыгъоу текIыжьыгъэнымкIэ (апэрэ уцугъом) шъолъырым амалэу IэкIэлъхэр (тестхэм якIун, зэпа­хырэ узым зызэриушъомбгъу­рэм икоэффициент, IэзэпIэ уч­реждениехэр зэрэфэхьазыр­хэр) шапхъэхэм адештэх. Мы къэгъэлъэгъонымкIэ респуб­ли­кэр къэралыгъом иапэрэ субъекти 10-мэ ахэт.

АР-м и Премьер-министрэу Александр Наролиным къызэ­рэхигъэщыгъэмкIэ, апэрэ уцугъом игъэцэкIэн къыдыхэлъытагъэу шапхъэу щыIэхэр зы­гъэцакIэхэрэ квадратнэ метрэ 400-м нэс зэрылъ сатыушIыпIэ предприятиехэу мыгъомылэпхъэ товархэр зыщэхэрэм, джащ фэдэу чIэхьэпIэ шъхьаф зиIэхэ парикмахерскэхэм ыкIи салонхэм яIофшIэн рагъэжьэжьыщт.

Урысыем и Роспотребнадзор иеплъыкIэ, ащ ышIыгъэ унашъо­хэр къыдалъытэзэ мы IофшIэныр зэхащэнэу республикэм ипащэ къафигъэпытагъ.

Министрэу Мэрэтыкъо Рустем къызэриIуагъэмкIэ, шъолъырым истационаритIум коронавирусыр къызпыхьэгъэ нэбгырэ 223-мэ ащяIазэх. Ахэм ащыщэу 6-р реанимацием илъых, зыр ИВЛ-м иаппарат пыгъэнагъ. Ащ дакIоу блэкIыгъэ илъэсым мыщ фэдэ иуахътэ егъэпшагъэмэ, 2020-рэ илъэсым имэзиплI къэхъугъэ сабыйхэм япчъагъэ нэбгыри 124-кIэ зэрэнахьыбэр гушIуагъо.

Джащ фэдэу коронавирусыр къызпыхьэгъэ сымаджэхэм афэ­гъэзэгъэ медицинэм иIофышIэ 863-мэ къатефэрэ тынхэр аратыгъэх, ахэм сомэ миллион 44,8-рэ атырагощагъ. ЗэкIэмкIи мы лъэныкъом федеральнэ гупчэм къытIупщырэ сомэ миллиони 153,3-рэ ыкIи респуб­ли­кэм имылъку сомэ миллиони 8,2-рэ пэIуагъэхьащт. Ащ нэ­мыкIэу гъэлъэшыгъэ шIыкIэм Iоф зышIэрэ медики 160-мэ яспискэ зэхагъэуцуагъ, рес­пуб­ликэ бюджетым къыхэхыгъэ тынхэр ахэм атырагощэщтых.

Красногвардейскэ районым зэпахырэ узым ылъэныкъокIэ непэ иIофхэм язытет зыфэдэм штабым хэтхэр тегущыIагъэх. Александр Наролиным зэрэщигъэгъозагъэхэмкIэ, сымаджэ хъугъэ нэбгырэ 203-м щыщэу 79-мэ стационар шIыкIэм тетэу яIазэх. Шапхъэхэр зыукъуагъэ­хэм алъэныкъокIэ административнэ протоколи 167-рэ зэхагъэуцуагъ. Мы IофшIэныр джыри лъагъэкIотэнэу Адыгеим и ЛIышъхьэ къафигъэпытагъ. Джащ фэдэу цIыфыбэ зыщы­псэурэ Тэхъутэмыкъое районми анаIэ тырагъэтын зэрэфаер къа­риIуагъ. Бэдзэрхэм Iоф зэрашIэщтыгъэ уахътэр зэтегъэуцожьыгъэным фэгъэхьыгъэ предложе-ниеу зэхэсыгъом къыщахьыгъэм республикэм ипащэ дыригъэштагъ. Режимым игъорыгъоу текIыжьыгъэным иапэрэ уцугъо къыдыхэлъытагъэу нэбгырэ минищым ехъумэ IофшIэныр аублэжьын амал яIэщт.

ТХЬАРКЪОХЪО Адам.