Коронавирусэу SARS-CoV-2-м къыпкъырыкIырэ уз хьылъэу COVID-19-р къяутэлIагъэ-къямыутэлIагъэр гъэунэфыгъэным пае Урысыем жъугъэу тестхэр пкIэ хэмылъэу щаIахыхэу рагъэжьагъ.

Ащ фэдэ тестхэр пэтхъу-Iутхъум, жьы къэщапIэхэм япхыгъэ узхэм агъэгумэкIыхэрэм, чъыIэр лъэшэу зижъагъэхэм къягоуагъэхэм заIахырэр мэзищ хъугъэ. ЦIыфхэм ащ фэдэ тестхэм шIуагъэу апылъыр, блэкI имыIэу анализхэр затын фаер, замытми хъущтыр ашIэмэ ашIоигъу. Роспотребнадзорым эпидемиологиемкIэ и ЦНИИ идиректор игуадзэу Александр Гореловым ащ фэгъэхьыгъэу «Российскэ гъэзетым» иупчIэхэм джэуап къаритыжьыгъ.

— Коронавирусыр къяу­тэлIагъэмэ зэрагъэунэфырэ тестэу ПЦР-м ыпэ рапшIэу укъытегущыIэ тшIоигъу. Медицинэ IофышIабэмэ ащ цыхьэшхо фашIырэп. Компьютер томогра­фием вируснэ пневмониер къызигъэлъагъокIэ, COVID-отделениехэм аIут врачхэр тестым икIэуххэм ямыжэнхэу зэзэгъыгъэхэ фэдэу зэхэтхыгъ.

— Тестэу ПЦР-мкIэ сыма­джэм къеутэлIагъэр COVID-19-мэ е нэмыкI зэпахырэ узмэ агъэунэфын алъэкIы. Ау мыщ дэжьми хэукъохэу къызэрэхэ­кIырэр къэIогъэн фае. ГущыIэм пае, пневмонием ыгъэгумэкIырэм ичыишъхьэ къырахырэм коронавирусыр къыгъэлъагъорэп ар нахь чыжьэу зэрекIотэхы­гъэм къыхэкIэу. Сымаджэхэм нахь псынкIэу яшIуагъэ арагъэ­кIыным пае тест ПЦР-м къы­гъэлъэгъощтым емыжэхэу къы­хэкIы. ЕтIанэ анализхэм якIэ­ух­хэр хьазыр зыхъухэкIэ, узыр тэрэзэу зэрагъэунэфыгъэр къэ­шъыпкъэжьы.

— ЦIыфхэм япроцент 80-у COVID-19-р къы­зэмыутэлIагъэхэм е псынкIэу ар зыпэкIэкIыгъэхэм коронавирус ­лъэпкъ горэ ыпэкIэ къяузыгъэу, ащ COVID-19-м ахэр щиухъумэхэ фэдэу бэмэ аIо. Сыд ащ къепIолIэн плъэкIыщт?

— Ащ фэдэу зэраIорэр тэрэзэп. Коронавирусхэм апкъ къи­кIыкIэ илъэс къэс цIыфхэм япроценти 10–20-мэ пэтхъу-Iутхъу, ныбэ уз зэфэшъхьафхэр къяуталIэх. Гриппыр къапымыпкIэным пае илъэс къэс цIыфхэр прививкэ ашIых. Адэ ащ нахьи бэкIэ нахь щынэгъо корона­вирусыр къызэутэлIагъэр на­хьыбэрэ ар къыпымыхьажьыным сыдэущтэу щыгугъын ылъэ­кIыщта?

ЕтIани къэIогъэн фае SARS-CoV-2-м къыздихьырэ тхьамыкIэгъошхохэм афэдэхэр ыпэкIэ щыIэгъэ коронавирусхэм къа­зэракIэмыкIощтыгъэр, зигугъу къэтшIыгъэ узхэм афэдэхэр къы­зэутэлIагъэхэм жъугъэу тест­хэр зэраIамыхыщтыгъэр. ЦIыфэу сымэджэгъахэм икIэ­рыкIэу узыр къызыпыпкIэжьыщтыр тшIэрэп. Джыры ныIэп ащ фэдэ ушэтынхэр ашIхэу заублагъэр. УрысыемкIи Iофхэр джащ фэдэ къабзэх.

— COVID-р къызэузы­гъахэм нэмыкI сыма­джэм ишIуагъэ ригъэ­кIышъунэу аIо. Ау ыпэ­рэм ылъ мыкъабзэмэ, нэмыкI уз горэ сымаджэм къыпыпкIэнкIэ щына­гъоба?

— Сымэджагъэм ылъ зыхакIэхэрэр зиIоф дэй дэдэхэр ары. ВИЧ-р, гепатитыр ыкIи нэмыкIхэр ащ хэлъхэмэ пэшIорыгъэшъэу зэрагъашIэ ыкIи ищыкIагъэ зыхъурэм аукъэбзы.

Зэпахырэ узхэм лъэшэу зызаушъомбгъурэ, нэбгырэ минишъэ пчъагъэ къызызэдэсы­мэджэрэ лъэхъаным зи IэпыIэгъунчъэу къэбгъанэ хъущтэп. Джащ фэдэ лъэхъанхэм нэ­мыкI зэпахырэ узхэм зэряIазэхэрэ препаратхэр агъэфедэнхэу фи­тыныгъэ яI ахэр къазэрашъхьапэщтхэмкIэ лъапсэхэр щыIэхэ зыхъукIэ.

— Коронавирусыр зыпэкIэкIыгъэм ииммунитет нахь пытагъэу, «иммуннэ паспортхэр» ятыгъэн фаеу хэгъэгу заулэмэ алъытэ. Псауныгъэм икъэухъумэн фэгъэзэгъэ Дунэе организацием ащ къыдыригъаштэ­рэп, ащкIэ лъэпсэ икъу щымыIэу елъытэ. Сыд фэдэ еплъыкIа о ащ ­фыуиIэр?

— «Иммуннэ паспортхэр» ятыгъэн фаеу зэраIорэм пкIэ имыIэу сеплъы. Коронавирус лъэпкъ горэкIэ узэрэсымэджагъэм пае COVID-19-р къыо­мыутэлIэхэным ущыгугъынэу щытэп. Гриппым паекIи илъэс къэс цIыфхэр прививкэ ашIы­хэба?

Зигугъу къэтшIыгъэ узыр зы­пэкIэкIыгъэм икIэрыкIэу ар къы­зеутэлIэжьыщтыр хэти ышIэ­рэп. Ау мэзитIу темышIэу ащ ымыгъэгумэкIыщтхэ фэдэу ме­дицинэ IофышIэхэм къаIо.

– Коронавирусым ятIо­нэрэу къытыригъэзэ­жьыным ищынагъо щыIэ фэдэу бэмэ къаIо. Ащ фэдэ уз къызэутэлIэгъахэр нахь псынкIэу ар пэкIэкIыным щыгугъы хъущта?

— Коронавирусыр нэмыкI зэпахырэ узхэм бэкIэ атекIы. Шъогъазэр, эпидемическэ паротитыр цIыфхэм зэ къызэряузырэр. Коронавирусыр пчъа­гъэрэ къяутэлIэн ылъэкIыщт, ащ къытыримыгъэзэжьыным ущыгугъынэу щытэп. Грипп къямыутэлIэнымкIэ вакцинэу ахалъхьэрэм илъэсныкъо фэдиз ныIэп ишIуагъэ къызэрэкIорэр. КоронавирусыкIэм узэрэпэуцужьыщт шIыкIэмкIэ джыри бэ тшIэн, тIэ къидгъэхьан фаер.