УмышIэрэ пшъашъэр хъункIакIом IашэкIэ ыгъэ­щынэу плъэгъумэ, сыда апэу узэгупшы­сэщтыр? «СиIофэп» пIоныр IэшIэх, ау ухъулъфыгъэу ащ урихьылIагъэмэ, гукIэ узы­фэхьазыр хэкIыпIэм улъыхъущтба?

Бжыхьэ пчыхьэ рэхьатым Щынджые щыпсэурэ Трэхъо Вячеслав ителефонэу унэм итыр къытеуагъ. Трубкэр къызештэм, Краснодар дэс икIалэу Эдуард игумэкIыгъохэр къыIуатэхэу фежьагъ. ОшIэ-­дэмышIэу зэдэгущыIэгъур зэ­пыугъ, макъэр зэхихырэп.

2004-рэ илъэсым ихъугъэ-­шIагъ къэтIуатэрэр. А лъэхъаным В. Трахъом сотовэ телефон иIагъэп. ГуIэм хэтэу имашинэ итIысхьи, ыкъо дэжь ежьагъ. ПсэупIэу Яблоновскэ нэсыгъэу «ГазелымкIэ» къэнэгъэ гъогур ыкIунэу Вячеслав рихъухьи, цIыфыбэ зэрымыс таксиим итIысхьагъ. Пшызэ телъ лъэмыджышхор къызэра­нэкIымэ «Газелыр» къыгъэуцунэу В. Трахъор водителым елъэIугъ.

— Къэмыгъэуцу, — къыIуагъ мэкъэ лъэшкIэ аужыкIэ щыс кIалэхэм ащыщ. — Ахъщэу шъуIыгъыр къэшъумыштэмэ, мы пшъашъэр шIосыбзыщт!

ИтеплъэкIэ гум фэмыштэрэ кIалэу шъэжъыер пшъашъэм ыпшъэ езыхьылIагъэм бырсырэу къыIэтыгъэм хигъахъощтыгъ. «Газелым» исхэм, водителыри зэрахэтэу, ахъщэу къаугъоигъэр паIом илъэу хъункIакIом фащэигъ. ЯтIонэрэ техэкIо-хъун­кIакIори къэтэджыгъ.

Ахъщэм къызылъэIабэм

Шъэжъыер зытыращэегъэ пшъашъэу Екатеринэ кIыфы хъугъэу техакIор къеIункIыгъ. Водителым нахь къыпэблагъэ зэхъухэм, зы хъункIакIоу пшъа­шъэр къэзымытIупщырэр ахъщэу паIом фыралъхьагъэм къы­лъыIэбагъ.

А уахътэр Трэхъо Вячеслав ыгъэфеди, техакIом утын рихы шIоигъоу еуагъ, ау икъоу бжымыр тыригъэфагъэп. Пшъашъэм ынатIэ еутэкIыгъ.

ЯтIонэрэ хъункIакIоу «Газелым» исыгъэм шъэжъыер къы­шти, тIогъогогъо Трэхъо Вячеслав къыхисагъ, гуIэм хэтэу шъхьангъупчъэмкIэ «Газелым» икIыжьэу фежьагъ.

Гъыщхэм ащыщ водителым «Газелыр» къыгъэуцугъ, бзэджа­шIэхэм къатекууагъ, ау къе­дэIугъэхэп. ШъхьангъупчъэмкIэ икIыжьырэ хъункIэкIо кIалэм водителыр лъычъагъ, Iэдэ-уа­дэм­кIэ тIогъогогъо утын ри­хыгъ шъхьае, къызэтыригъэуцон ылъэ­кIыгъэп.

Пшъашъэм пчъэр къыIуихыгъ

Вячеслав лъакъокIэ хъун­кIа­кIом зеом, «Газелым» ыкIэ нэс ыдзыгъ. Шъэжъыер къытыри­хынэу ебэнэу фежьагъ. Теха­кIом шъэжъыер ыпэкIэ къы­зе­щэим, Вячеслав лъыIаби, Iашэр ыблыгу чIиубытагъ. Пшъа­шъэу ыпэкIэ щысым нэгъэу­пIэпIэгъу нэплъэгъур ыгъэфеди, «Газелым» ипчъэ къыIуихынэу игъо ифагъ.

ХъункIакIом В. Трахъор ебэны­зэ, машинэм къизыгъэх, асфальткIэ гъэпкIэгъэ гъогум Вячеслав шъхьэкIэ тефагъ, псынкIэу зыкъиIэтыжьынэу амал къызфигъотыжьыгъэп.

МашIом кIэзыгъэстырэ техакIор плъыр-стырым хэт. Шъэ­жъыер зыIэкIигъэкIынэу фаеп. УIэгъитIу зытещэгъэ В. Трахъом лъыр кIэчъы. ТехакIор гум ылъэ­ныкъо ыкIи ышъхьэ шъэжъыемкIэ къео.

Вячеслав къызэкIакIорэп. Шъэжъыер икIэрыкIэу къызыты­рещаем, ыIэ ыубыти, хъун­кIа­кIом ыкIыб рифызылIагъ. Шъэ­жъыер къыIэкIихи, ащ ытамэ теIункIагъ, чIым рифызылIагъ.

— Шъэжъыер хэIу, ушъхьамыс техакIом, — къезыIуа­гъэхэри бзылъфыгъэу щыты­гъэхэм къахэкIыгъэх.

— Шъэжъыер хъункIакIом ыпшъэ хэсIунэу амал сиIагъ, ау ар къезгъэкIугъэп, — къеIо­тэжьы Вячеслав. — Шъэжъыер чыжьэу Iусыдзыгъ…

Водителэу Гъыщыр ятIонэрэ техакIом лъычъагъ, утынхэр рихыгъэх, ау IэкIэкIыжьыгъэу къызегъэзэжьым, В. Трахъом лъы фабэр кIэчъызэ кIочIаджэ зэрэхъурэр ылъэгъугъ. Хъун­кIа­кIохэр наркоманхэу зэрэщытхэр нэужым къышIагъ.

КъулыкъушIэхэр къызэсыхэм

Зэпшъэшъэгъухэу «Газелым» исыгъэхэм ащыщэу Наталье телефонкIэ милицием икъу­лыкъушIэхэм афытеуи, макъэ ари­гъэIугъ. ГАИ-м икъулыкъушIэхэр къа­пэмычыжьэхэу щытыгъэхэти, псынкIэу чIыпIэм къынэсыгъэх. Шъэжъыер зытыращэегъэ пшъа­шъэу машинэм исыгъэр (Екатерин ыцIэр) гумэкIыгъо хэтыгъ. IэпыIэгъу псынкIэм фэгъэзэгъэ машинитIу къэкIуагъ, Екатери­нэрэ Вячеславрэ сымэджэщым екIурэ гъогум тыращагъэх.

ПсынкIэу нагъэсыгъэх

Милицием икъулыкъушIэхэм гъогум къырыкIохэрэ машинэхэр къагъэуцухэзэ, медицинэм иIофышIэхэу IэпыIэгъу псынкIэм фэгъэзагъэхэм ямашинэхэр ХБК-м исымэджэщ нагъэсыгъэх.

УIэгъи 4 утынхэр зытыра­щэ­гъэ Трэхъо Вячеслав врачхэр къеIазэхэу фежьагъэх, ау лъыр зэрэчIинагъэм фэшI къи­ны­гъуабэ иIэ хъугъэ. Ыгу къы­зэу­­цуми медицинэм иIофышIэ­хэм хэкIыпIэ къагъотын алъэ­кIыгъ.

Зы цагэр зэпакIи, гум теIун­кIэхэзэ, жьыр къырагъэщэ­жьыгъ. Ары шъхьае, къэтэджыщтыр хэгъэкIи, къыоплъыгъэкIи укъи­шIэжьырэп. Мэфэ 40 щылъыгъэу игулъытэ къызэIуихыжьыгъ, гъомылапхъэу фащэирэм къылъыплъэу фежьагъ.

Килограмм 74-рэ къэзыщэ­чыщтыгъэ хъулъфыгъэр килограмм 50 фэдиз хъугъэу сымэ­джэщым къычIэкIыжьи, ылъэ теуцожьыгъ. Зэпшъэшъэгъухэр

Краснодар краим щыщхэ зэпшъэшъэгъухэу Екатеринэ, Наталье, фэшъхьафхэу «Газелым» исыгъэхэм Вячеслав лIыгъэу къызыхигъэфагъэм осэ ин фашIыгъ. Сымэджаплъэ къы­фэкIуагъэх, ыдэжь къуаджэм къакIохи, иIахьылхэм «тхьашъуе­гъэпсэу» къараIожьыгъ. Наталье чIэсынэу Краснодар унэ щыриIэ зэхъум, апэрэ хьакIэу ригъэблэгъагъэр Трэхъо Вячеслав ары.

АгъэлъэпIагъ

Зэпшъэшъэгъухэм яIахьылхэр Краснодар краим иадми­нистрацие фэтхагъэх, В. Тра­хъом ымышIэщтыгъэхэ пшъа­шъэхэр къызэриухъумагъэхэр нэбгырэ шъэ пчъагъэхэм щы­сэшIу зэрафэхъугъэр хагъэу­нэфыкIыгъ.

В. Трахъом связым епхыгъэу Iоф зыщишIэщтыгъэ псэу­пIэу Инэм дэтым краим иадми­нист­рацие ипащэ илIыкIохэр къакIохи, Iэпшъэ сыхьат дахэ шIухьафтын къыфашIыгъ, гу­щыIэ фабэхэр къыфаIуагъэх.

Адыгэ Республикэм и Правительствэ Трэхъо Вячеслав рагъэблагъи, ифэIо-фашIэхэм ягъэцэкIэнкIэ, ипсауныгъэ гъэпытэгъэнымкIэ IэпыIэгъу къы­фэхъугъэх. Зэхэщэн Iофыгъохэр загъэцакIэхэм ыуж Уры­сыем и Президентэу Владимир Путиныр кIэтхэжьи, медалэу «За отвагу» къыфагъэшъошагъэр Мыекъуапэ къы­щыратыжьыгъ. В. Трахъор медицинэм иIофышIэхэм, зэкIэ къы­фэгумэкIыгъэхэм лъэшэу афэраз.

Спортыр пытапIэм икъэкIуапI

ШъэжъыекIэ гъогогъуи 4 къып­хэпыджагъэхэу лъыр къыо­чъэхызэ, хъункIакIом Iэ гъушъэ­кIэ упэуцунышъ, Iашэр къы­теп­хыным гу пытэ ищыкIагъ. КIуа­чIэр, къулайныгъэр — ахэри бгъэфедэнхэ плъэкIын фае.

В. Трахъор ицIыкIугъом къы­щегъэжьагъэу физкультурэм, спортым апылъ. Футболым, ат­летикэ псынкIэм, кушъхьэ­фэчъэ спортым, фэшъхьафхэм афэщагъэу илъэс еджэгъухэр Щынджые щигъэкIуагъэх.

Гъунэгъу къуаджэу Тэхъутэмыкъуае кушъхьэфачъэмкIэ кIозэ, шъхьафит бэнакIэм зыфигъасэщтыгъ. Адыгеим, Краснодар краим ащыцIэрыIо Гъомлэшк Руслъан иапэрэ тренер. В. Трахъом спортымкIэ ятIонэрэ разрядым ишапхъэхэр ригъэкъугъэх, самбэмкIи ба­нэщтыгъ.

— Спортыр ары сыгу зыгъэ­­пытагъэр, лъэкI къысхэзы­лъ­хьагъэр, — къеIуатэ Вячеслав. — Тренерэу Гъомлэшк Руслъан спортым имызакъоу, ­лъэпкъ шэн-хабзэхэм тафигъасэщтыгъ. Сыфэраз, Тхьэм ащ джэнэт къырет.

Трэхъо зэшхэр

«Трэхъо зэшхэр лIыгъэм ищы­сэх» ыIоу «Адыгэ макъэм» джырэблагъэ тхыгъэ къыхиу­тыгъ.

— Ахэр сятэшых, — тизэ­дэгущыIэгъу лъегъэкIуатэ Трэхъо Вячеслав. — Гъэзетым иредакцие «тхьашъуегъэпсэу» есIожьы сшIоигъу тилIакъо ыцIэ­кIэ тхыгъэр къызэрэхиуты­жьы­гъэм фэшI.

Трэхъо зэшхэу Исмахьил, Сахьид, Мэдин, Уалид, Хъалид Хэгъэгу зэошхом лIыгъэ ахэлъэу щызэуагъэх. Ленинград икъэухъумэн хэлэжьэгъэ Трэхъо Хъалидэ къытиIогъагъ: «Ленинград къэзыухъумагъэхэм тамэкIэ къинэу зэрахьагъэр тщыгъупшэ хъущтэп».

Тарихъыр бгъэлъэпIэн, лIэ­ужхэм язэпхыныгъэ гъэпытэгъэн зэрэфаем, нэмыкI шIэжь Iофыгъохэм Хъалидэрэ сэрырэ татегущыIэу уахътэ къытэ­кIугъ.

Вячеслав ятэу Асхьадэ зэрэныбжьыкIэм фэшI Хэгъэгу зэошхом щызэуагъэп, заом ыкIыб щыIэу Iофэу ышIэрэмкIэ ТекIоныгъэм и Мафэ къэзыгъэблэгъагъэхэм ащыщ.

Асхьадэ ыкъохэу Вячеслав, Инвер, Аскэр, Аслъан, Аслъанбэч дзэм къулыкъур щахьыгъ. Инвер подполковник хъугъэу ащ къыхэкIыжьыгъ. Ятэшхэм заом лIыгъэу щызэрахьагъэр агъэлъапIэ, шъхьэкIафэ афашIы.

ЕмтIылъ Нурбый.