Адыгэ Республикэм испорт еджапIэу N 2-м КIокIыпIэм къыщежьэгъэ шъхьэзэкъо зэнэкъокъухэмкIэ гъэхъагъэхэр ешIых.

Урысыем шотоканымкIэ изэ­нэкъокъоу 2019-рэ илъэсым гъэ­т­хэпэ мазэм щыIагъэм Адыгэ Республикэм ихэшыпыкIыгъэ командэ тыжьыныр къыщыди­хыгъ.

Дунаим шотоканымкIэ изэнэ­къокъоу Португалием щыкIуагъэр Адыгеим ибэнакIоу Александр Рудь шIукIэ ыгу къэкIыжьы. Урысыем ихэшыпыкIыгъэ командэ хэтэу дышъэр къыфагъэшъошагъ.

Урысыем ихэшыпыкIыгъэ командэ Европэм икомандэхэм язэнэкъокъу шотоканымкIэ апэрэ чIыпIэр къыщыдихыгъ. Хэгъэгум ихэшыпыкIыгъэ командэ Александр Рудь фэбэнагъ.

Адыгэ Республикэм испорт­смен анахь дэгъухэу 2019-рэ илъэсым къыхахыгъэхэм Александр Рудь ащыщ. Адыгэ Респуб­ликэм изаслуженнэ тренерэу Хьаткъо Ахьмэд бэнакIор егъасэ. Александр Рудь спортымкIэ дунэе класс зиIэ мастер хъугъэ.

Урысыем и Кубок къыдэхыгъэ­ным фэгъэхьыгъэ зэнэкъокъум 2019-рэ илъэсым, бжыхьэм Адыгеим ихэшыпыкIыгъэ командэ ящэнэрэ чIыпIэр къыщыдихыгъ. Уджыхъу Эльдар, Александр Рудь, Ахътао Дамир, Хьабэхъу Щамилэ яIэпэIэсэныгъэкIэ къахэщыгъэх. 2020-рэ илъэсым, гъэтхэпэ мазэм Урысыем иныбжьыкIэхэм язэ­IукIэгъухэм тибэнакIохэм шотоканымкIэ медальхэр къыщахьыгъэх. Зэхэщэн Iофыгъохэм ягъэ­цэкIэн чанэу хэлэжьагъ Хьаткъо Инал.

Хьабэхъу Щамилэ илъэс 18 — 20 зыныбжьхэм якуп тыжьыныр къыщыдихыгъ, Урысыем спортымкIэ имастер ишапхъэхэр ригъэкъугъэх.

Къуикъо Амир, илъэс 16 — 17, Лиана Штаховам, илъэс 14 — 15, джэрзхэр къахьыгъэх. Щ. Хьа­бэхъур, Л. Штаховар, А. Къуи­къор хэгъэгум ихэшыпыкIыгъэ ныбжьыкIэ командэ аштагъэх, Европэм изэнэкъокъу зы­фагъэ­хьазыры.

Шэуджэн Алкъэс, Сергей Литвиновыр, Кристина Спиридоновар, Анна Загорэ, фэшъхьафхэри хэгъэгум ихэшыпыкIыгъэ командэхэм арагъэблэгъэщтхэу тэгугъэ, ясэнаущыгъэ къызэIуа­хынымкIэ амалышIухэр яIэх.

Уджыхъу Эльдар 2019-рэ илъэ­сым Урысыем спортымкIэ имастер хъугъэ. 2020-рэ илъэсым, гъэтхапэм хэгъэгум изэнэкъокъу дышъэр къыщихьыгъ.

— Спортым ныбджэгъушIухэр щызгъотыгъэх, КъокIыпIэм къыщежьэгъэ бэнакIэхэр сшIогъэшIэгъоных, — къыIуагъ Уджыхъу Эльдар.

— Хьаткъо Ахьмэд гуетыныгъэ ин хэлъэу ныбжьыкIэхэм Iоф адешIэ, — къытиIуагъ Адыгэ Республикэм испорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс. — Спортышхом медальхэр къызэрэщахьыхэрэм дакIоу, псауныгъэ пытэ яIэным, цIыфышIу хъунхэм ныбжьыкIэхэр фегъасэх. «Адыгэ Республикэм изаслуженнэ тренер» зыфиIорэ щытхъуцIэр къызэрэфаусыгъэм фэшI Хьаткъо Ахьмэд тыфэгушIо, игъэхъагъэхэм ахигъэхъонэу тыфэлъаIо.

Адыгэ Республикэм итренер анахь дэгъухэу 2019-рэ илъэсым къыхахыгъэхэм ащыщ Хьаткъо Ахьмэд. — Спортыр ищыIэныгъэ хэпхын умылъэкIыщтэу елъытэ. ИгушIуагъо къыдэзыгощыхэрэм гъэзетымкIи «тхьашъуегъэпсэу» ариIожьы шIоигъу. Ыгъэсэрэ ныбжьыкIэхэм щыIэныгъэм щыпхыращырэ лъагъом егъэгушхо.