ПсынкIэ сфэIощтэп! Ау уфэтхэн плъэкIыщт лэжьакIом, шIэныгъэлэжьым, лIыхъужъым, зы­горэм игъэхъагъи, ау тхэкIо цIэрыIом уфэ­тхэныр псынкIэ Iофэу щытэп.

Хьау! Тхэнымрэ, усэнымрэ, гущыIэм идэхагъэрэ зэрафэ-Iа­зэм фэшIэп. ТхакIом игупшы­сэ нэпкъыхэр лъагэх, ишапхъэ­хэр иных, сыд фэдэ Iофи екIолIакIэу фыриIэр шъхьафы. Ары лъэпкъыр зыгъэлъэп­къы­рэр, лIэшIэгъухэр зэзып­хырэр, хахъо иIэу тидунай лъызыгъэ­кIуатэрэр!

Зы лIэшIэгъу нахь мышIэми тыкъызыхэхъухьагъэр, МэщбэшIэ Исхьакъ Кавказ заор, граждан заор, блэкIыгъэ зэошхор къэзышIэжьырэ цIыфмэ ахэтыгъ, тэ тилъэхъан совет хабзэм итыгъэ зыщиIэтыгъэмрэ зыщыкъохьажьыгъэмрэ ахэтыгъ, непэ къэхъурэ ныбжьыкIэхэр нэфэшъхьаф гупшысэмэ ахэтхэу къэхъух. А пстэуми шапхъэ уафэхъоу уафэтхэныр, зэIэпахызэ ахэм тхэныр лъагъэкIотэныр псынкIэ Iофэп. КъэкIощт лъэхъа­ным нэмыкI еплъыкIэхэри, екIо­лIакIэхэри, тхакIохэри къыз­дихьынхэ ылъэкIыщт, ау ахэр зыгъэшхэкIыщтхэр, зыгъэшъо­кIыщтхэр непэрэ лъапсэр ары, лъэгапIэу зытетыщтхэр непэрэ нэпкъхэр ары. Ары тхэкIо-уса­кIом уфэтхэныр псынкIэп сэзыгъаIорэр. МэщбэшIэ Исхьакъ — адыгэ литературэм ишэпхъэ инхэр зыIэтыхи, лъызыгъэкIуа­тэхи, лъэпсэшIу фэзышIыгъэхэм зэу ащыщ. ЛIэшIэгъу пчъа­гъэм лъэпкъым игупшысэхэр, игумэкIхэр ыугъоихэзэ, ыукъэ­бзыхэзэ игъэшIэ гъогу къыкIугъ. Ыгуи ыпси зыхэлъ тхылъхэр джэрпэджэжьэу джы къы­тэджэжьых. Зы лIэшIэгъоп, лIэ­шIэгъуитIоп ахэм амакъэ зы­Iущтыр. ТхакIом лъэпкъыр ыгъэлъапIэу уасэу фишIыгъэм фэдиз ежьми лъэпкъым къыфишIыжьыгъ. Непэ усакIом ыкIуачIэрэ игупшысэрэ зыпкъы зэдитых. Идунай ины! Иогуи лъагэ! Икъэлэмыпи чаны! Лъэп­къыр джыри Исхьакъ щэгугъы ихьэсэ шIагъэ къыщимыгъакIэу, илэжьыгъэ бэгъуагъэ хахъо фи­шIызэ бэрэ псэунэу. * * * Мафэхэр мэхъух ШIум сыфэзэщэу, Сыгу пэблагъэхэр Слъэгъу сшIоигъохэу. Джащыгъум апэу Сыгу укъихьагъэу, Птхыгъэмэ сяджэ Сафэзэщыгъэу.

Ины дунаеу О къытфэпшIыгъэр, Усэхэр жъуагъоу Огум ипхъагъэу! ЛIэшIэгъу пчъагъэу, А зыинагъэр, СшIэрэп убгъэгу Зэрэдэфагъэр.

Лъэпкъым ихъишъэ Лъэпкъым ипшысэ, Саусэрыкъоу Къытфэохьыжьы! Тыдэ тыкIуагъэу Гъогу тытенагъэми, О уиорэды Тыкъыхещыжьы.

Дахэшъы дахэ Уигугъэ нэпкъхэр! Уихьэсэ шIагъэ Игъоу мэшъхьалъэ! Джыри уипсалъэ Лъагэу зеIэты, УичIылъэ гъогуи Хьалэлэу окIу.

О уиорэдхэр — Нэфынэх, чэфых! Угу ифэбагъэ Тыгъэу къахэпсы. Гукъэо нэпсыхэр Джыри гъушъыгъэп, Лъэпкъым икъинхэм УакъыхэкIыгъэп.

Чэщырэ мэхъу Сэри сыгугъоу, Псалъэ сылъыхъоу Гъогу сытехьагъэу. Джащыгъум мэхъу Пщэу къеIыхыгъэм, Убгъэ хэлъ жъуагъом Сыкъыхищыжьэу. * * * Мафэр кIуасэу ЗэкIэнэжьми, Гугъэр жъуагъоу Тапэ ит! Ехьыжьагъэу Шым тытесми, ТыкIэмыхьэу Гъогу тытет!

О сигуапэу СыпфэлъаIо: Уигухэлъхэр МыкIосэнхэу! Уапэ итэу Гугъэу кIорэм УкIэхьэфэ

Упсэунэу!

ГъукIэлI Нурбый.