Адыгэ Республикэм и Къэралыгъо Совет – Хасэм и Президиум зэхэсыгъоу иIагъэр республикэ парламентым и Тхьаматэу Владимир Нарожнэм зэрищагъ.

Адыгэ Республикэм и Къэралыгъо Совет — Хасэм и LI-рэ зэхэсыгъо Iофыгъо 50-м ехъумэ щахэплъагъэх.

Парламент комитетхэм ятхьаматэхэм комитетхэм язэхэсыгъохэм зыщатегущыIэгъэхэ ыкIи хэплъэнхэу Президиумым рахьылIэгъэ Iофыгъохэм зэрадэлажьэхэрэм афэгъэхьыгъэу къаIотагъ. Ахэм ащыщых Адыгэ Республикэм изаконопроектхэу хэбзэIахь режим гъэнэфагъэу «Профессиональнэ хахъомкIэ хэбзэIахьыр» Адыгэ Республикэм щагъэфедэу заублэщтым, бюджет Iофхэм, къэралыгъо граждан къулыкъум ыкIи нэмыкIхэм афэгъэхьыгъэхэр.

Зичэзыу зэхэсыгъом зыщахэплъэщт Iофыгъохэм ахагъэхьагъ Адыгэ Республикэм и Къэралыгъо Совет – Хасэм Урысые Федерацием и Правительствэ и Тхьаматэу М.В. Мишустиным фигъэхьыщт тхылъыр. Урысые Федерацием и Правительствэ 2020-рэ илъэ­сым мэлылъфэгъум и 24-м ышIыгъэ унашъоу № 576-р зытетэу «Предпринимательствэ цIыкIумрэ гурытымрэ апылъхэу урысыем иэкономикэ иотраслэхэм ащылажьэхэу коронавирусым ыпкъ къикIы­кIэ анахьэу зэрар зыхьыгъэхэм 2020-рэ илъэсым федеральнэ бюджетым исубсидиехэр зэраIэкIагъэхьащтхэ ШIыкIэр ухэсыгъэным ехьылIагъ» зыфиIорэм зэхъокIыныгъэ фэшIыгъэным ар фэгъэ­хьыгъ.

Джащ фэдэу Адыгэ Республикэм и УплъэкIу-лъы­тэкIо палатэрэ цIыфым ифитыныгъэхэмкIэ Уполномоченнэу Адыгэ Республикэм щыIэмрэ 2019-рэ илъэсым Iофэу ашIагъэмкIэ яотчетхэм ядэIунхэу, Урысые Федерацием ишъолъырхэм ялIыкIо къулыкъухэр кIэщакIо зыфэхъугъэ Iофтхьабзэхэм яхьылIэгъэ тхылъхэу парламентым къыIукIагъэхэм ахэплъэн­хэу рахъухьэ. Президиумым изэхэсыгъо унашъо зэрэщаштагъэмкIэ, Адыгэ Республикэм и Къэралыгъо Совет — Хасэм изичэзыу зэхэсыгъо жъоныгъуа­кIэм и 27-м щыIэщт.