Коронавирусым зимыушъомбгъунымкIэ шэпхъэ гъэнэфагъэхэм республикэр зарыгъозэрэ лъэхъанми парламентариехэр социальнэ хъытыухэмкIэ, электрон почтэкIэ е онлайн амалхэмкIэ хэдзакIохэм алъэIэсых.

ГущыIэм пае, мы аужырэ лъэхъаным нэбгырэ 50 фэ-дизмэ жэрыIокIэ е тхыгъэкIэ Адыгэ Республикэм и Къэралыгъо Совет — Хасэм зыкъыфагъэзагъ. ЗэкI пIоми хъунэу ахэм ялъэIухэр афагъэцэкIа­гъэх. Парламентым идепутатэу Бастэ Хьисэ иунэе мылъкукIэ планшетэу къыщэфыгъэр Тэу Руслъан иунагъоу Мыекъуапэ дэсым ратыгъ. Руслъан я 2-рэ купым хэхьэрэ сэкъатныгъэ иI, ишъхьэгъусэ Iоф ышIэрэп, илъэ­сихрэ илъэсипшIрэ зыныбжь сабыитIу иI. Ипшъэшъэжъыеу гурыт еджапIэм чIэсыр идесэхэр ыгъэцэкIэжьынхэмкIэ планшетым фэныкъощтыгъ. Ау унагъом ащ фэдэ амал иIагъэпти, Тэу Руслъан Адыгэ Республикэм и Къэралыгъо Совет — Хасэм и Тхьаматэу Владимир Нарожнэм зыфигъэзагъ.

— Зэпахырэ узым зыкъызиштэгъэ апэрэ мафэхэм къащегъэжьагъэу сэкъатныгъэ, гъот макIэ зиIэхэм зэрадеIэ­хэрэм, ящыкIэгъэ препаратхэм, зызэраухъумэрэ пкъыгъохэм якъэщэфынкIэ медицинэ учреждениехэм IэпыIэгъу зэрафэхъухэрэм афэшI парламентариехэм лъэшэу сафэраз. Анахьэу зыцIэ къыхэзгъэщмэ сшIоигъор шIушIэн Iофхэм чанэу апылъ депутатэу Бастэ Хьис ары. Ащ иIэпыIэгъу Хэгъэгу зэошхом иветеранхэми, социальнэу мыухъумагъэхэми аIокIэ. Республикэм иIэзапIэхэм медицинэ оборудованиер ращэфынэу ащ сомэ миллион 22-рэ аритыгъ, — хигъэунэфыкIыгъ Адыгэ Республикэм и Къэралыгъо Совет — Хасэм и Тхьаматэу Владимир Нарожнэм.

Джащ фэдэу ащ къызэрэхигъэщыгъэмкIэ, коронавирусым зимыушъомбгъунымкIэ, экономикэр къемыгъэIыхыгъэнымкIэ Урысые Федерацием и Президент, и Правительствэ, Адыгэ Республикэм и ЛIышъхьэ, иминистрэхэм я Кабинет унашъоу аштэхэрэм хэбзэ лъапсэ афызэхэщэгъэным депутатхэм яшъыпкъэу Iоф дашIэ.