Пенсионерхэм ахъщэ тынэу къафакIохэрэр банкым икартэу «Мир» зыфиIорэмкIэ къаIэкIэхьанэу бэдзэогъум и 1-м нэс агъэпсыжьын фаеу щытыгъ. Коронавирусым зимыушъомбгъуным фытегъэпсыхьэгъэ Iофтхьабзэхэм къахиубытэу, ар чъэпыогъум и 1-м нэс афызэкIахьагъ.

Мы пIалъэм зыблэкIыкIэ ахъщэ тынхэр картэу «Мирыр» ары ныIэп къызэрагъэхьащтхэр. Ар банкым счет щишIыгъэу, банкоматымкIэ къызIэкIэзгъахьэхэрэр ары зынэсыхэрэр. ПочтэмкIэ е нэмыкIэу пенсиехэр аIэкIэзгъахьэрэ организациемкIэ къызфакIо хабзэхэмкIэ, ащ тетэу къэнэжьыщт.

Законым къызэрэщыдэлъытагъэм тетэу картэу «Мирым» тегъэхьажьыгъэн фэягъэхэм мы уахътэм ар агъэфедэ. Арэу щытми, картэр къаIихыжьынэу игъо имыфагъэхэри щыIэх. Ахэр, коронавирусым зимыушъомбгъуным пае къагъэнэфэгъэ шапхъэхэр аукъозэ, банкым кIонхэ ищыкIагъэп. Ахъщэ тынхэр нэмыкI картэу нахьыпэкIэ яIагъэм къихьащтых.

Пенсиехэм афэгъэхьыгъэ законым къызэрэщыдэлъытагъэмкIэ пенсионерым ахъщэ тынхэр почтэмкIэ къыфэкIощтмэ, пенсиехэр аIэкIэзгъахьэрэ организацием къыфихьыщтымэ е банкым счетэу щыриIэм къихьащтмэ ежь къыхихын фит. Ащ пае лъэIу тхы­лъыр фондым ичIыпIэ органэу зыпэблагъэм е МФЦ-м ащитын ылъэкIыщт, электроннэ шIыкIэр ыгъэфедэн амали иI.

УФ-м ПенсиехэмкIэ ифонд зэзэгъыныгъэ зыдишIыгъэ организациехэр ары ахъщэ тынхэр аIэкIэзгъэ­хьанхэу фитыныгъэ зиIэхэр.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.