Унагъо зэдэзышIэн, гухэлъэу ашIыгъэр джэгу дахэкIэ къэзыгъэбаин гупшысэхэр зиIагъэхэм пандемием иягъэ аригъэкIыгъ. МэфэкI Iоф­тхьабзэхэр зэхащэн, Iахьыл-гупсэхэр хъярым къырагъэблэгъэнхэ фытыныгъэ мы уахътэм цIыфхэм яIэп.

ЗАГС-м и ГъэIорышIапIэу Адыгеим щыIэм иупчIэжьэгъу шъхьаIэу Джамырзэ Заремэ къызэриIуагъэмкIэ, зызэгозытхэн шIоигъоныгъэ зиIэу тхьапэхэр къэзыгъэхьыгъагъэхэм зэкIэм телефонкIэ афытеуагъэх, цIыфыбэ къырагъэблэгъэн фитыныгъэ зэрямыIэщтым щагъэгъозагъэх, нэмыкI уахътэ къыхахыныр хэкIыпIэшIоу зэ­рэщытыр араIуагъ.

— Зэшъхьэгъусэ зэфэхъун гухэлъ зиIэхэм анахьыбэм ма­фэр лъагъэкIотагъ, ау гухэлъэу ашIыгъэр зэблэзымы­хъужьыгъэхэри къахэкIыгъэх, — къыIуагъ Джамырзэ Заремэ. — Мыгъэ мэлылъфэгъум и 1-м къыщегъэжьагъэу жъоныгъуа­кIэм и 18-м нэс тштэмэ, зэ­шъхьэгъусэ хъун гухэлъ зиIэу 106-рэ зэгуатхагъ. БлэкIыгъэ илъэ­сым мыщ фэдэ уахътэм пчъагъэр 227-рэ хъущтыгъэ.

Пчъагъэхэм къагъэлъагъо мэфэкI Iофтхьабзэ зэхэзыщэн шIоигъоныгъэ зиIэ цIыфхэр пандемиер текIыфэ ежэнхэ гухэлъ зэрашIыгъэр. Анахь мэхьанэ ин зиIэ мафэхэм аха­лъытэрэр дахэу, ныбджэгъухэр, Iахьыл-гупсэхэр ягъусэхэу рагъэкIокIынэу къыхахы ыкIи мэ-зэ заулэкIэ лъыкIотагъэу зэрэ­хъурэм ыгъэщынэхэрэп.

Сыд фэдэ Iофыгъуи къымыгъэуцоу, гухэлъэу ышIыгъэр щыIэныгъэм пхырищынэу теубытэгъэ пытэ зышIыгъэхэри къахэкIыгъэх. ЗАГС-м шапхъэу ыгъэуцугъэхэр ахэм араIуагъ ыкIи ащ тетэу зэгуатхэщтыгъэх. ЗАГС-м и ГъэIорышIапIэу Адыгеим щыIэм къызэрэщаIуагъэмкIэ, апэрэ мафэхэм нэбгы­ри 10-м шIомыкIэу къырагъэ­благъэщтыгъ. Нэужым ныбжьыкIитIоу зызэгозытхэщтым нэмыкI ЗАГС-м чIагъахьэщтыгъэп.

Джамырзэ Заремэ тызэрэщигъэгъозагъэмкIэ, зызэгозы­тхыкIыжьырэмэ япчъагъи пандемием къыкIоцI нахь макIэ хъугъэ. 2019-рэ илъэсым унэгъо 213-рэ зэхэкIыжьыгъэхэу атхыгъ, мыгъэ — 70-рэ. Мыщ уезыгъэгупшысэрэ лъэныкъохэри хэлъых. ЦIыфхэр унэм зэдисхэ зэхъум, нахь зэпэблагъэ хъугъэха, хьауми пандемием ыпкъ къикIыкIэ ягухэлъ лъагъэ­кIотагъа? Сыдэу щытми, гумэкIыгъор зытекIыкIэ, мы пчъагъэу къэтхьыгъэм зэхъокIыныгъэ ин фэмыхъунэу тэгугъэ.

Гъонэжьыкъо Сэтэнай.