Зэфэхьысыжьэу экспертхэм ашIыгъэхэм зызафэбгъазэкIэ, сериалхэм яплъырэ цIыфхэм лъэныкъо зэфэшъхьафиплIым къыщымыкIэу шIуагъэ къахахы.

Апэрэр — гумэкIыгъоу цIыфыр зыхьырэр нахь макIэ ешIы

Загъорэ, психотерапевтхэм къяолIэрэ цIыфхэм сериалхэм яплъыхэзэ «загъэхъужьынэу» араIо. Экспертхэм зэраIорэмкIэ, бэрэ Iоф зышIэхэрэр, ренэу пшъыгъэу зызылъытэжьыхэрэр, нэмыкIхэу, ышъхьэ зыригъэгъэ­псэфыныр зищыкIагъэхэр се­риалхэм яплъыхэмэ яшIуагъэ къякIыщт.

ЯтIонэрэр — насыпыр ыкIи псауныгъэр

Зэфэхьысыжьэу ашIыгъэхэм къызэрагъэлъагъорэмкIэ, цIыфым ыгукIэ икIэсэ сериалым еплъы зыхъукIэ, акъылыр мэгупсэфы. Ащ ишIуагъэкIэ пкъы­шъолым нахь дэгъоу Iоф ышIэнэу регъажьэ, гумэкIэу къы­шъхьащыощтыгъэхэм къащэкIэ.

Ящэнэрэр — узщыгугъыжьыныр

ЦIыфым сыдигъуи, ежь зыдимышIэжьэу сериалым хэтхэм зарегъапшэ. Геройхэм чIыпIэ къиным къикIыжьынхэ алъэ­кIыгъэмэ, гумэкIыгъо горэ зэшIуахыгъэмэ, е гухэлъэу яIа­гъэр къадэхъугъэмэ — цIыфыр нахь гушхо мэхъу ыкIи ыкIуачIэ щэгугъыжьы. Арышъ, нахь гушхоу шъукъэлъэгъонэу шъуфаемэ — сериалхэм шъуяплъ.

ЯплIэнэрэр — гъэсэныгъэр

Сериалхэм уяплъы зыхъукIэ, зызэрэбгъэпсэфырэм дакIоу гъэсэныгъэ гъэнэфагъэ зэо­гъэгъоты. Iушыгъэ зыхэлъ сюжетхэм яшIуагъэкIэ цIыфыр гупшысэн, щыIэныгъэр нахь куоу къызIэкIигъэхьан амал иIэ мэхъу. Джащ фэдэу, тарихъыр зыпхырыщыгъэ сериалхэми шIуагъэ къахьы. ЦIыфым ишIэныгъэхэм ахегъахъо, тапэкIи тарихъыр зэригъэшIэным къыфагъэущы. Ау, бгъэхалъхьэм лъэны­къуитIу зэриIэм фэдэу, сериалхэм гумэкIыгъохэри къыз­дахьын алъэкIыщт. Апэрэр — чэщ мычъыехэр

ЦIыфым ыгукIэ щэчыгъое сюжетым зеплъырэ нэуж, чэщым хэчъыежьыныр къехьы­лъэкIы. Зэфэхьысыжьыр — чэщ мычъые къызэрекIурэр ары.

ЯтIонэрэр — пщэрыщэ хъунхэмкIэ щынагъо ­къэуцу

Ушэтынэу ашIыхэрэм къы­зэрагъэлъагъорэмкIэ, сериалхэр зикIасэхэм япроцент 60-м ехъур шхэхэзэ ахэм яплъых. СериитIум къыщегъэжьагъэу 6-м нэс пэмыкIхэу еплъых. Ащ фэгъэхьыгъэу хэушъхьафыкIыгъэ цIэ фаусыгъ —– «binge wat­ching». Сериалым зыще­плъырэ уахътэм цIыфыр, нахьыбэрэмкIэ, зимыгъэсысэу щэсы. Зэфэхьысыжьэу фэхъурэр — лъым, цIыфым ыкIоцI илъ органхэм нахь жъажъэу Iоф ашIэ­нэу рагъажьэ, ащ къыкIэлъэкIо пщэрыщэ хъуным ищынагъо.

Ящэнэрэр — психическэ псауныгъэр

Ушэтынхэм къызэрагъэлъагъорэмкIэ, цIыфыр нахьыбэрэ сериалхэм яплъы къэс, ылъэ­гъугъэр ищыIэныгъэ къыхэхьэ. ГумэкIыгъохэм яплъыныр зи­кIасэхэм депрессие яIэным ищынагъо щыI. Арышъ, ащ фэдэ сюжет зыпхырыщыгъэ сериалхэм бэрэ ямыплъынхэу психологхэр цIыфхэм къяджэх.

Психологхэм яеплъыкIэ зызщыдгъэгъозэгъэ нэуж сериалхэр зикIасэхэм гущыIэгъу та­фэхъугъ. Мыхэм анахьэу ахагъуатэрэр, къыхахынэу зыкIэ­хъурэм тыкIэупчIагъ.

Сусана:

— НахьыбэрэмкIэ сызэ­плъы­рэр Тыркуем щытырахыгъэ се­риалхэр арых. Ахэм нэмыкI щыIэныгъэм ухащэрэм фэд. ЗебгъажьэкIэ, чIэбдзын умы­лъэкIэу, къарыкIощтым уигъэгумэкIэу лъэшэу узIэпащэ. Щы­Iэныгъэм тызэолIэрэ лъэ­ныкъохэр зэкIэ — гушIуагъуи, нэшхъэигъи, чIыпIэ къинхэри ащытэлъэгъу. Пшъхьэ къырыкIогъэ горэхэри гум къагъэ­кIыжьы, гухэлъэу зыфэпшIы­гъэмэ ащыщхэри ахыолъагъо. КъыхэкIы, пшысэм фэдэу, чы­жьэу щыIэ дунаир къагъэ­лъа­гъоу. Сэ сызэреплъырэмкIэ, сериалхэр къин умылъэгъоу уахътэр бгъэкIоным фытегъэ­псыхьагъэх.

Саида:

— Сериалхэм шIогъэ гъэ­нэфагъэ къахэсхэу сэлъытэ. ГущыIэм пае, джырэ уахътэ сызэплъырэ «Новая невестка» зыфиIорэм щыIэныгъэм тызэолIэрэ щыIакIэр хэсэлъагъо. Тэрэзэу умызекIоныр зэрэмыдахэр, унагъом зэгурымыIо­ныгъэу къыхэфэн ылъэкIыщтхэр, ахэр герой шъхьаIэхэм зэрэдагъэзыжьырэр щысэлъэгъух. НэмыкI лъэныкъокIэ сы­къызеплъыкIэ, сериалхэм яшIуа­гъэкIэ сшъхьэ зигъэпсэфын, мафэ къэс сызэгупшысэрэ щы­Iэныгъэм тIэкIу сытыращын алъэкIы. Нэужым, гукъыдэчъыр нахьыбэ хъугъэу уимафэхэм закъыфэогъэзэжьы. Сериалыр лъэшэу сшIогъэшIэгъон зыхъукIэ, чэщы кIахэм нэс сеплъын сэлъэкIы, неущ IофшIэным сызэрэкIощтми сыкъыгъэуцурэп. Езгъэжьагъэр сэухыфэ, герой шъхьаIэхэм къарыкIощтыр сэлъэгъуфэ сызэгоуты.

Марина:

— Сериалхэм уахътэ сиIэ зыхъукIэ, сикIасэу сяплъы. На­хьыбэрэмкIэ Урысыем ыкIи Тыркуем ащытырахыгъэхэр ары сызэплъыхэрэр. Сюжетэу къыгъэлъагъорэр сищыIэныгъэ фэдэуи къыхэкIы. Ащ фэдэхэм нахь сшIогъэшIэгъонэу сяплъы. Герой шъхьаIэм чIыпIэ къинхэр зэрифэшъуашэу къызэри­нэ­кIыгъэхэ зыхъукIэ, ори кIуачIэ къыпхилъхьагъэ фэдэу къып­щэхъу. Ащ фэдэм упхырыкIы­шъунэу узщэгугъыжьы. Ау зэ­фэхьысыжь дэйхэр зыфэхъурэ сериалхэр сикIасэхэп, ащ фэ­дэхэм лъэшэу сагъэгумэкIы.

Сэ сшъхьэкIэ, сериал гъэшIэгъон горэм сытефагъэмэ сеплъы, ау ащ пае чэщы кIахэм нэс сыщысыныр сишэнэп. Герой шъхьаIэу хэтхэм сафэгумэкIызэ сеплъы, ащ къыхэкIэу чIыпIэ къинхэр бэрэ къызхафэхэрэр щысэгъэзыех.

Гъонэжьыкъо Сэтэнай.