ЦIыфхэр зезыщэхэрэм алъэплъэх
Адыгеим и Къэралыгъо автоинспекцие икъулыкъушIэхэр лицензие зимыIэ водительхэу цIыфхэр зезыщэхэрэр къыхэгъэщыгъэнхэм лъэплъэх.
Коронавирусым ыпкъ къикIыкIэ зекIоныр зыгъэмэкIэрэ Iофтхьабзэу агъэнэфагъэхэм къахиубытагъэх автобусхэмкIэ цIыфхэр зезыщэхэрэр: шъолъырхэм азыфагу дэтхэр, къэлэ кIоцIым ыкIи ащ игъунэгъу къутырхэм къащекIокIыхэрэр.
Хэбзэгъэуцугъэм ишапхъэхэр зэрагъэцакIэхэрэм лъыплъэгъэным къыдыхэлъытагъэу инспекторхэм «Автодорнадзорым» и ГъэIорышIапIэ илIыкIохэр ягъусэхэу пэшIорыгъэшъ Iофтхьабзэ рагъэкIокIыгъ.
Ар окIофэ шапхъэхэр аукъуагъэу хъугъэ-шIагъэ къыхагъэщыгъэп. Джащ фэдэу уплъэкIунхэм къагъэлъэгъуагъ транспорт амалхэр шапхъэхэм зэрадиштэхэрэр ыкIи «Роспотребнадзорым» къыгъэуцугъэ санитарнэ шапхъэхэр водительхэм зэрагъэцакIэхэрэр. Мы Iофыр инспекцием зэпигъэущтэп, тапэкIи лъагъэкIотэщт.