Шапхъэхэр зымыгъэцакIэхэрэм пхъашэу адэзекIощтых
Адыгеим ибэдзэрхэмрэ иермэлыкъхэмрэ яIофшIэн тIэкIу-тIэкIузэ зыпкъ рагъэуцожьы. ПэшIорыгъэшъ Iофтхьабзэхэр зезыхьагъэхэр ары ныIэп Iоф зышIэнэу езыгъэжьэжьыхэрэр. Ахэм зэу ащыщ Мыекъуапэ игупчэ бэдзэри. Ащ исатыушIыпIэхэр зэкIэ дезинфекцие ашIыгъэх, коронавирусыр къяутэлIагъэмэ зэрагъэшIэнэу щэкIо 600-м фэдизмэ тестхэр аIахыгъэх.Адыгеим и ЛIышъхьэу КъумпIыл Мурат Мыекъуапэ игупчэ бэдзэр бэмышIэу щыIагъ, щэфакIохэм маскэхэмрэ Iалъэхэмрэ къызфагъэфедэхэмэ бэдзэр дэхьапIэм дэжь зэрэщауплъэкIухэрэр, антисептиккIэ аIэхэр зэрарагъэтхьакIырэр, сатыушIхэм азыфагу метрэ пчъагъэу дэлъын фаер къызэрыдалъытэрэр нэрылъэгъу къыфэхъугъ.
Республикэм и ЛIышъхьэ щэфакIохэм адэгущыIагъ, бэдзэрхэр зызэфашIыхэ лъэхъаным шапхъэу агъэнэфэгъагъэхэр яунэ къыщыдалъытагъэхэмэ яупчIыгъ, сатыур зэрэкIорэр, продукциехэм къазэракIэупчIэхэрэр зэригъэшIагъ. ЗаухъумэнымкIэ шапхъэу щыIэхэр цIыфхэм шIокI имыIэу къыдалъытэн зэрэфаер, армырмэ ермэлыкъхэр зэрэзэфашIыжьыщтхэр ЛIышъхьэм къыIуагъ.
— Мэкъу-мэщым епхыгъэу лажьэхэрэм япродукцие IуагъэкIынымкIэ, щэфакIохэм мылъапIэу гъомылапхъэхэр къызIэкIагъэхьанхэмкIэ бэдзэрхэм мэхьанэшхо зэряIэр къыдгурэIо. Ау анахьэу тэ тызыпылъын фаер цIыфхэм ящынэгъончъагъ ары. Роспотребнадзорым шапхъэу къыгъэуцугъэхэр зымыгъэцакIэхэрэм пхъашэу адэзекIощтых, — хигъэунэфыкIыгъ Адыгеим и ЛIышъхьэ.
КъумпIыл Мурат къэлэ мэрием, Адыгэ Республикэм экономикэ хэхъоныгъэмрэ сатыумрэкIэ и Министерствэ, Роспотребнадзорым Адыгэ РеспубликэмкIэ и ГъэIорышIапIэ пшъэрылъ афишIыгъ ермэлыкъхэр зыщыкIорэ чIыпIэхэм санитар-эпидемиологие шапхъэхэр шIокI имыIэу къащадалъытэнхэм анаIэ тырагъэтынэу.