ГъэрекIо ыныбжь илъэс 84-рэ хъугъэ Шэуджэн районым ит къуаджэу Хьакурынэхьаблэ щыщэу, Адыгеим хэгъэгу кIоцI IофхэмкIэ и Министерствэ изаслуженнэ IофышIэу Тхыгъо Юрэ Алый ыкъом. Илъэс 30-рэ ащ Адыгеим хэгъэгу кIоцI къулыкъум иухъумэкIо-конвой подразделение къулыкъур щихьыгъ.

Тхыгъо Юрэ 1965-рэ илъэсым IофшIэныр ОВД-м иконвой подразделение милиционер-водителэу щыригъэжьагъ. Илъэс 30-рэ а IэнатIэр щытхъу хэлъэу ыгъэцэкIагъ, а уахътэм къыкIоцI милицием истаршина пащэхэми, иIофшIэгъу­хэми шъхьэкIафэ ыкIи уасэ къызфаригъэшIын ылъэкIыгъ.

Джащ фэдэу ыгу етыгъэу ыкIи пшъэдэ­кIыжьэу ыхьырэр къыгурыIозэ Шэуджэн район отделым ипшъэрылъхэр щытхъу хэлъэу щигъэцэкIагъэх. Ар къаушыхьаты иIофшIэнкIэ гъэхъагъэу иIэхэм. Тхы­гъо Юрэ СССР-м хэгъэгу кIоцI къулыкъум и Министерствэ имедалэу «За безупречную службу» зыфиIорэм истепенищ къыфагъэшъошагъ. 1981-рэ илъэ­сым «Милицием иотличник» зыфиIорэ бгъэхалъхьэр къыратыгъ. 1985-рэ илъэ­сым «IофшIэным иветеран», 1987-рэ илъэсым «За отличную службу по охране общественного порядка» зыфиIорэ медальхэр къыфагъэшъошагъэх.

1992-рэ илъэсым «АР-м хэгъэгу кIоцI IофхэмкIэ и Министерствэ изаслуженнэ IофышI» зыфиIорэ щытхъуцIэр Тхыгъо Юрэ къыфаусыгъ. Ащ нэмыкIэу юбилейнэ медальхэр ыкIи министерствэм ищытхъу тхылъхэр мымакIэу иIэх.

Тхыгъо Юрэ бэшIагъэу пенсием щыI нахь мышIэми, зыпари ымышIэу щысэп, ежь опытэу IэкIэлъыр къызфигъэфедэзэ къыткIэхъухьэрэ лIэужхэм яхэгъэгу шIу алъэгъоу къэтэджынхэм, полицейскэ ныбжьыкIэхэм пIуныгъэ тэрэз ягъэгъотыгъэным иIахьышхо хешIыхьэ.