Адыгеим и Къэралыгъо автоинспекцие игукъэкIыкIэ социальнэ сетеу «Instagram» зыфиIорэм «ЮИД АДЫГЕЯ» зыцIэ аккаунт щагъэпсыгъ. КъыткIэхъухьэрэ лIэужхэр, шъэожъы­ехэр ыкIи пшъэшъэжъыехэр, ЮИД движением хэщэгъэнхэм, ащ имэхьанэ зэхягъэшIэгъэным фэшI Адыгеим и Къэралыгъо автоинспекцие икъулыкъушIэ­хэмрэ республикэм и ЮИД отрядхэм япащэхэмрэ зэгъусэхэу аккаунтыр инстаграмым щагъэпсыгъ.

Джащ фэдэу мы аккаунтым игъэпсын лъапсэ фэхъугъэхэм ащыщ 2019-рэ илъэсым, шэкIогъум Москва щыкIогъэ Урысые форумэу «ГъогурыкIоныр щынэгъончъэныр» зыфиIорэм апэрэ кIэухэу фэхъугъэр. Мы Iофтхьабзэм Урысыем ишъолъыр зэфэшъхьафхэм къарыкIыгъэ­хэ инспектор ныбжьыкIэ 350-м ехъу, джащ фэдэу ахэм якIэлэегъаджэхэр ыкIи ГИБДД-м иIофышIэхэр хэлэжьагъэх. Ащыгъум форумым хахьэу ЮИД движением тапэкIэ хэхъоныгъэ егъэшIыгъэнымкIэ документ шъхьаIэу концепциер щаштагъ.

Агъэпсыгъэ аккаунтэу «ЮИД АДЫГЕЯ» (ayuid01) зыфиIорэм мы уахътэм ехъулIэу къэбарыбэ къипхын плъэкIыщт.

Мы мафэхэм Урысые Интернет-марафонэу «ЮИД за Победу благодарит!» зыфиIорэр атIу­-пщыгъ. ТекIоныгъэ къызыдахыгъэр мыгъэ илъэс 75-рэ зэ­рэ­хъугъэм фэгъэхьыгъэу Хэгъэгу зэо­шхом хэлэжьэгъэ ягупсэхэм ясурэтхэр, видеотехыгъэхэр кIэ­лэцIыкIухэм къырагъахьэх.

Республикэм иинспектор ныбжьыкIэ­хэм ямызакъоу Iоф­тхьабзэм чанэу къы­хэлажьэх кIэлэегъа­джэхэри. Ахэм ятхыгъэ материал 40 фэдиз Интернетым инэкIубгъо къырагъэхьагъ. ТэпэкIэ «ЮИД АДЫГЕЯ» зыфиIорэм инэкIубгъо респуб­ликэм иинспектор ныбжьыкIэхэм ягъэ­хъагъэхэри къыщыхаутыщтых.