Илъэси 3 — 15 зыныбжь кIэлэцIы­кIухэм зэтыгъо ахъщэ IэпыIэгъоу со­мэ мини 10 къаратыщт. Ащ епхыгъэ лъэIу тхылъыр чъэпыогъум и 1-м нэс атын алъэкIыщт.

Зэтыгъо ахъщэ IэпыIэгъур сабый пчъагъэу уна­гъом исым елъытыгъэп ыкIи а ныбжьым къы­хиубытэрэ нэбгырэ пэпчъ телъытагъ. ЖъоныгъуакIэм и 12-м къыщегъэжьагъэу лъэIу тхылъхэр аштэхэу рагъэ­жьагъ ыкIи 2020-рэ илъэсым чъэпыогъум и 1-м нэс лъыкIотэщт.

Iудзыгъэ шIыкIэм тетэу Кэралыгъо фэIо-фашIэхэм япорталкIэ лъэIу тхы­лъыр птын плъэкIыщт: http://posobie16.gosuslugi.ru/, ПенсиехэмкIэ фондым иотделение ыкIи Къэралыгъо ыкIи муниципальнэ фэIо-фашIэхэр лъэныкъуабэкIэ зыгъэцэкIэрэ Гупчэм.

Iудзыгъэ шIыкIэм тетэу лъэIу тхылъыр птыным пае кIэлэцIыкIур къызы­хъугъэр къэзыушыхьатырэ тхылъыр ыкIи ащ и СНИЛС ищыкIагъэхэр, нэмыкI тхылъ ны-тыхэм рагъэгъу­сэн фаеу къыдыхэлъытагъэп.

Зэтыгъо ахъщэ IэпыIэгъур ны-тыхэм ыкIи къа­Iызыхыгъэу сабый зыпIу­хэрэм къаратыным фэшI Iудзыгъэ шIыкIэм фэмыехэр УФ-м ПенсиехэмкIэ ифонд кIонхэ алъэкIыщт. Паспортыр ыкIи сабыир ыпIунэу къызэра­Iихыгъэр къэзыушыхьа­тырэ тхылъыр зыдиштэнхэ фае.

2020-рэ илъэсым мэ­къуогъум и 1-м къыще­гъэжьагъэу ахъщэр къатынэу рагъэжьэщт. Хэбзэ­Iахьыр хаубытыкIыщтэп ыкIи нэмыкI социальнэ IэпыIэгъухэу къаратыхэ­рэм ялъытыгъэщтэп.

ЖъоныгъуакIэм и 12-м къыщегъэжьагъэу и 25-м нэс лъэIу тхылъыр зытыгъэхэм ахъщэ IэпыIэгъур къазащыратыщт пIалъэр зэхъокIыщтэп, мэкъуогъум и 1-м къыщегъэжьагъэу къафырагъэхьащт. Iэшъынэ Сусан.