Къэралыгъо автоинспекцием Iоф зэришIэрэр
Адыгеим гъогурыкIоныр щынэгъончъэнымкIэ и Къэралыгъо автоинспекцие хэушъхьафыкIыгъэ IофшIакIэм тIэкIу шIагъэу зэрэтехьагъэмкIэ макъэ къегъэIу.
Къэралыгъо фэIо-фашIэхэр афэгъэцэкIэгъэнхэмкIэ, гъогурыкIоным лъыплъэнхэмкIэ, административнэ хэбзэукъоныгъэхэм япхыгъэ Iофхэм ахэплъэнхэмкIэ цIыфхэм благъэу адэмыгущыIэнхэм фэшI шIыкIэ амал тедзэхэр къулыкъум къыгъотыгъэх.
Транспорт амалхэр тхыгъэнхэмкIэ, зефэнымкIэ фитыныгъэр къыдахыным ыкIи ушэтыныр атыным фэшI къэралыгъо ыкIи муниципальнэ фэIо-фашIэхэм я ЗыкI портал пэшIорыгъэшъэу зыхатхэн фае.
Транспорт амалым изэхэлъыкIэ зэхъокIыныгъэ фашIыным епхыгъэ фитыныгъэр электроннэ шапхъэм илъэу къыдахыным зэхъокIыныгъэ фэхъущтэп. Ащ пае заявкэр хэушъхьафыкIыгъэ электроннэ почтэм иадрес рагъэхьынышъ, чэзыум тетэу хэплъэщтых.
Адыгеим и Къэралыгъо автоинспекцие иподразделениехэм яэлектроннэ почтэхэм яадресхэр:
— къалэу Мыекъуапэ — texnadmkp01@mvd.ru — Мыекъопэ районыр — texnadmkrn01@mvd.ru — Джэджэ районыр — texnadgiag01@mvd.ru — Кощхьэблэ районыр — texnadksh01@mvd.ru — Красногвардейскэ районыр — texnadkrsn01@mvd.ru — Теуцожь районыр — texnadadg01@mvd.ru — Тэхъутэмыкъое районыр — texnadtht01@mvd.ru
Транспорт амалым изэхэлъыкIэ зэрэзэблахъугъэр щынэгъончъагъэм ишапхъэ зэрэдиштэрэмкIэ, джащ фэдэу транспорт амалхэу щынэгъо хьылъэхэр зезыщэхэ зышIоигъохэм свидетельствэр къыдахынымкIэ пэшIорыгъэшъэу мы телефонхэмкIэ зарагъэтхын фае: Мыекъуапэ — 8 (8772) 59-68-58; Мыекъопэ районыр — 8 (87777) 2-11-83; Джэджэ районыр — 8 (87779) 9-19-54; Кощхьэблэ районыр — 8 (87770) 9-10-02; Красногвардейскэ районыр — 8 (87778) 5-24-63; Теуцожь районыр — 8(87772) 9-20-20; Тэхъутэмыкъое районыр — 8 (87771) 9-67-69.
ЗефэнымкIэ фитыныгъэ къыдэзыхыщтхэм ушэтыныр зэратыщт шIыкIэри автоеджапIэхэм адызэхафыгъ. Экзамен зытынэу къекIолIэщт нэбгырэ пчъагъэр нахь агъэмэкIагъ.
Административнэ хэбзэукъоныгъэхэм язэхэфын амал зэриIэкIэ а зыщыхъугъэ чIыпIэм щызэхафы. Ау IофымкIэ унашъо ашIынэу зымыхъукIэ, гъогу хъугъэ-шIагъэр тхыгъэн фаемэ, цIыфыр къызыщекIолIэщт пIалъэр ыкIи уахътэр фагъэнафэ, хэушъхьафыкIыгъэ унэм ращэ е шъхьангъупчъэмкIэ зэхафы.
Транспорт амалхэр тхыгъэнхэм япIалъэ зыукъуагъэхэм алъэныкъокIэ пшъэдэкIыжь арамыгъэхьынэу подразделениехэм яIофышIэхэм араIуагъ.
ЦIыфхэм аIукIэхэрэ къулыкъушIэхэр амал пстэумкIи ухъумэгъэнхэ фае. Iоф зыщашIэрэ унэ кIоцIхэм сыхьатитIу тешIэ къэс санитарнэ Iофтхьабзэхэр ащызэрахьэх ыкIи жьы къабзэ къарагъахьэ.