Пандемиер къызщежьэгъэ уахътэм къыщыублагъэу тикъэра­лы­гъо щыпсэухэрэр хъугъэ-шIэгъэ гомыIухэм афэгъэхьыгъэ фильмэхэм (катастрофы) нахь яплъынхэу рагъэжьагъ.

«MEGOGO Россия» зыфиIорэм къызэритырэмкIэ, Стивен Содерберг тырихыгъэу «Заражение» зыфи­Iорэр ары анахьэу пстэури зэплъыгъэр.

«Заражение» зыфиIорэр вирусыкIэ къызэрежьэрэм къытегущыIэ. Ар ренэу зэ­рэзэхъокIырэм ыпкъ къи­кIыкIэ вакцинэ къагъотын алъэкIырэп. Вирусым процент 20-м ехъу илIыкIыгъ, псынкIэуи цIыфхэм зэпа­хыжьы. Псауныгъэр къэу­хъумэгъэнымкIэ Дунэе организациемрэ (ВОЗ-р) узхэр зыщагъэунэфырэ ыкIи защылъыплъэхэрэ Гупчэу США-м щыIэмрэ гумэкIы­гъом идэгъэзыжьын ыуж ехьэх.

Къэбарэу фильмым къы­Iуатэрэр джырэ уахътэ тызэолIэгъэ гумэкIыгъом ехьыщырэу щыт. Зэфэдэ­ныгъэу къахэпхын плъэ­кIыщтыр макIэп. Непэрэ ма­фэм вирусым зызэриу­шъомбгъурэр, цIыфхэм псын­кIэу зэрэзэпахыжьырэр фильмым къыгъэлъэ­гъорэ сюжетым фэд. Ащ къыхэкIэу мыр бэмэ ашIогъэшIэгъоны хъугъэ.

Психологхэм къызэраIо­рэмкIэ, цIыфым ежь гумэкIыгъоу иIэр къызщагъэлъэгъорэ фильмэхэр шIогъэшIэгъоных. УпчIэу къыфэущы­хэрэм яджэуапхэр зыщи­гъотыжьырэ, е ащ фэдэ чIы­пIэ ифагъэхэм хэкIыпIэу къагъотыгъэм зыщигъэгъозэн амал къезытырэ картинэхэр къыхехых.

Гъонэжьыкъо Сэтэнай.