Программэхэм къащыдэлъытагъэхэр лъагъэкIуатэх
Зэпахырэ узэу дунаир зэлъызыкIугъэм пэшIуекIорэ Iофтхьабзэхэм адакIоу къэралыгъо программэхэм, проектхэм къащыдэлъытагъэхэри Адыгеим щагъэцакIэх.
ГущыIэм пае, къоджэ псэупIэхэм хэхъоныгъэ ягъэшIыгъэным фытегъэпсыхьэгъэ программэм къыдыхэлъытагъэу Мыекъопэ районым культурэм иунэхэр щагъэцэкIэжьых, гъэстыныпхъэ шхъуантIэм икIуапIэхэр щагъэпсых, гъэпсэфыпIэ чIыпIэхэр, джэгупIэхэр щашIых. Мы уахътэм ахэм IофшIэнхэр къащызэтырагъэуцуагъэхэп.
АР-м мэкъу-мэщымкIэ и Министерствэ тызэрэщигъэгъозагъэмкIэ, ащ ипащэу Къуанэ Анзаур джырэблагъэ псэуалъэу ашIыхэрэм, агъэцэкIэжьыхэрэм ащыIагъ, зынагъэсыгъэхэр зэригъэлъэгъугъ. Культурэм иунэхэр станицэу Къурджыпсрэ къутырэу «Северо-Восточные Сады» зыфиIорэмрэ зыщагъэкIэжьыхэрэр. Программэм къызэрэщыдэлъытагъэмкIэ, станицэм иунэ сомэ миллиони 4-рэ мин 700-рэ, Северо-Восточные Сады дэтым сомэ миллион 43-м ехъу апэIуагъэхьащт. Мы илъэсым ыкIэм нэс ахэм IофшIэнхэр ащаухынхэу гухэлъ яI.
Джащ фэдэу поселкэу Табачнэм ирайонэу «Бытовик» зыфиIорэм километри 2,7-рэ хъоу гъэстыныпхъэ шхъуантIэм икIуапIэ щагъэпсы. Сомэ миллиони 2-рэ мин 500-рэ ащ тефэщт. Мыри илъэсэу тызыхэтым шIомыкIэуашIынэу ары зэрагъэнэфагъэр.
Мыщ фэдэ кIуапIэ щашIы станицэу Дагестанскэми. Ар киллометрэ 16,8-рэ зэкIэмкIи зэрэхъущтыр. Ащ щыщэу километри 4,6-р ары 2020-рэ илъэсым агъэпсынэу агъэнэфагъэр. Ар аухыгъ. Псэуалъэр зэрэщытэу 2021-рэ илъэсым атын гухэлъ яI, зэкIэмкIи тефэщтыр сомэ миллион 14-рэ мин 700-рэ.
Мыхэм анэмыкIэуи, къуаджэхэм хэхъоныгъэ ягъэшIыгъэным фытегъэпсыхьэгъэ программэм къыдыхэлъытагъэу, къутырхэу Северо-Восточные Сады, Пролетарскэм, поселкэу Табачнэм гъэпсэфыпIэ чIыпIэхэр, кIэлэцIыкIухэм апае джэгупIэхэр ащагъэпсых. Илъэсэу тызыхэтыр имыкIызэ аухынхэу ары зэрагъэнэфагъэр. ПстэумкIи зэхэубытагъэу мы псэуалъэхэм яшIын сомэ миллиони 6-рэ мин 500-рэ пэIухьащт.
Сомэ миллиони 169-м ехъу зэкIэмкIи тефэщт псэуалъэ щыбгъэуцуным тегъэпсыхьэгъэ площадкэу поселкэу Табачнэм щагъэхьазырырэм. Ащ щыщэу сомэ миллион 65-рэ мин 500-р ары илъэсэу тызыхэтым агъэфедэщтыр. Мы объектыр 2022-рэ илъэсым атынэу программэм къыщеIо.
ХЪУТ Нэфсэт.