Лъэныкъо зэфэшъхьафхэмкIэ кIэлэцIыкIу творчествэм иза­очнэ фестиваль Адыгеим щаублэ. Адыгэ Респуб­ли­кэм культурэмкIэ и Министерствэ ыкIи лъэпкъ культурэм и Гупчэ ащ кIэщакIо фэхъугъэх.

Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм Iофтхьабзэр фэгъэхьыгъ.

Тишъолъыр икъалэхэм ыкIи ирайонхэм ятворческэ купхэмрэ орэдыIохэмрэ фестивалым къырагъэблагъэх. Мыщ хэхьэх: орэдкъэIоныр, къэшъоныр, фольклорыр, лъэпкъ музыкальнэ Iэмэ-псымэхэм къарагъэIоныр, художественнэ къеджэныр. Илъэси 6-м къыщегъэжьагъэу 16-м нэс зыныбжь кIэлэцIыкIухэр хэлэжьэнхэ амал яI.

Фестивалыр зыщыIэщтыр мы илъэсым мэкъуогъум и 1-р — кIэлэцIыкIухэр къэухъумэгъэнхэм и Дунэе маф ары. Республикэм щыпсэурэ кIэлэцIыкIухэм явидеороликхэр зэкIэ социальнэ хъытыухэм къарагъэхьащтых.

Мы Iофтхьабзэу шIэжьым ыкIи дзэ щытхъум я Илъэс фэгъэхьыгъэр Лъэпкъ проектэу «Культура» зыфиIорэм къыдыхэлъытагъэу зэхащагъ.

Iэшъынэ Сусан.