ЦIыфхэм яшIошIхэр зыщызэрагъашIэрэ гупчэм зэригъэунэфыгъэмкIэ, тикъэралыгъо щыпсэухэрэм янахьыбэм (процент 62-мэ) ТекIоныгъэм и Мафэ фэгъэхьыгъэ Iофтхьабзэу рагъэкIокIыгъэхэм цIыфхэр зыкIыныгъэм фащагъэхэу алъытагъ.

ЫпэкIэ зигугъу къэтшIыгъэ гупчэм исайт къызэрэщатыгъэмкIэ, ТекIоныгъэм и Мафэ зэхащэгъэ Iофтхьабзэхэм цIыфхэр чанэу ахэлэжьагъэх. «Окна Победы» зыфиIорэм тихэгъэгу щыпсэухэрэм япроцент 26-р хэлэжьагъ. Акциеу «Свет Победы» зыфиIорэм процент 24-рэ, джащ фэдиз «Флаги России. 9 мая» зыфиIорэ Iофтхьабзэм ахэлэжьагъэх. «День Победы» зыфиIорэ орэдыр тикъэралыгъо щыпсэухэрэм япроцент 21-мэ къаIуагъ, процент 20-р балконым тетхэу «МыкIодыжьын полк» зыфиIорэм хэлэжьагъэх. ЗэрэхъурэмкIэ, тикъэралыгъо щыпсэурэ ятIонэрэ пэпчъ е иунагъо ис горэ ТекIоныгъэм и Мафэ фэгъэхьыгъэ Iофтхьабзэхэм ащыщ горэм хэлэжьагъ.

Коронавирусым зимыушъомбгъуным фэшI мэфэкI Iофтхьабзэхэр онлайн шIыкIэу рагъэкIокIыгъэх нахь мышIэми, ахэр цIыфхэмкIэ гуIэтыпIэ хъугъэх, зыкIыныгъэм нахь фищагъэх. Адыгеим ТекIоныгъэм и Мафэ ихэгъэунэфыкIын зэрифэшъуашэу къыщекIолIагъэх. Непэрэ мафэм ехъулIэу фронтым Iутыгъэ нэбгыри 139-рэ республикэм щэпсэу. Ахэм защафэгушIохэрэ тхыгъэу афагъэхьыгъэхэм АР-м и ЛIышъхьэу КъумпIыл Мурат акIэтхэ­жьыгъ. ШIухьафтынхэм ягъусэхэу волонтерхэм ахэр ветеранхэм аIэкIагъэхьа­гъэх. Нэужым видеозэпхыныгъэкIэ КъумпIыл Мурат ветеранхэм адэгущыIагъ, мэхьанэшхо зиIэ мэфэкIымкIэ ыгу къыдеIэу афэгушIуагъ.

ЖъоныгъуакIэм и 9-м Урысые акциеу «Сад Памяти» зыфиIорэр Мыекъопэ гупчэ мемориалым дэжь щыкIуагъ. Хэгъэгу зэошхом щыфэхыгъэхэм яшIэжь зэрагъэ­лъапIэрэм ишыхьатэу чъыгхэр щагъэтIысыгъэх. Адыгеим и ЛIышъхьэу КъумпIыл Мурат Iофтхьабзэм хэлэжьагъ. Онлайн шIыкIэм тетэу «МыкIодыжьын полк», «Экран памяти» «Золотые звезды Адыгеи» зыфиIорэ Iофтхьабзэхэр республикэм щырагъэкIокIыгъэх.

Къатыбэу зэтет унэхэм ащыпсэурэ ветеранхэм республикэм иартистхэр афэкIуагъэх ыкIи къэгъэлъэгъон гъэшIэгъонхэмкIэ агъэгушIуагъэх.

— Яков Ткачевымрэ Антонина Масановамрэ лъытэныгъэ ин афэтэшIы. Ахэр зэрэтигъунэгъум лъэшэу тырэгушхо, — къытфеIуатэ Мыекъуапэ щыпсэурэ Пэнэшъу Розэ. — Мамырныгъэр къытфэзыухъумэгъэ ветеранхэм къафагъэхьазырыгъэ къэгъэлъэ­гъоным тигуапэу теплъыгъ. БлэкIыгъэ илъэсхэм ахэр нэмыкI чIыпIэ рагъэблагъэщтыгъэх, ветеранхэр зэкIэ аугъоищтыгъэх ыкIи агъашIощтыгъэх. Ау мыгъэ, корона­ви­русым ыпкъ къикIыкIэ, Iофтхьабзэм изэхэщэн зэб­лэхъугъэ хъугъэ. СишIошIкIэ, мыщ фэдэ шIыкIэр нахь тэрэз, сыда пIомэ артистхэр ветераным нахь пэблагъэх, нахь агъашIо.

1925-рэ илъэсым шышъхьэIу мазэм Яков Ткачевымрэ Антонина Масановамрэ къэхъугъэх. Ахэм ныбжь яI нахь мышIэми, щыIэныгъэм чанэу къыхэлажьэх. Яков Ткачевыр гурыт еджапIэхэм бэрэ арагъэб­лагъэ, Хэгъэгу зэошхом фэгъэхьыгъэ къэбархэр кIэлэеджакIохэм къафеIуатэ, ныбжьыкIэхэм гущыIэгъу афэхъу. Тари­хъыр ашIэу, неущрэ мафэм мамырныгъэ тиIэу тыпсэуным мэхьанэшхо зэриIэр къагуригъэIоным пылъ.

ХэушъхьафыкIыгъэ купэу лъытэныгъэ ин къэзылэжьыгъэ ветеранхэм къафэкIуа­гъэхэм къагъэхьазырыгъэ къэгъэлъэгъо­ным еплъынэу къэзэрэугъоигъэр макIэп. Артистхэр хьылъэзещэ машинэм итхэу заом илъэхъан зэхалъхьэгъэ орэдхэр къаIуагъэх, цIыфхэр ахэм адежъыугъэх. Мыщ фэдэу ветеранхэр зэкIэ Адыгеим щагъэшIуагъэх. Сыд фэдэ гумэкIыгъо къэралыгъом къышъхьащымыуцуагъэми, мамырныгъэр къытфэзыухъумэгъэ тина­хьыжъхэр тщыгъупшэщтхэп, ахэм лIы­хъужъ­ныгъэу зэрахьагъэр ренэу тыгу илъыщт.

Коронавирусым ыпкъ къикIыкIэ дистанционнэу мыгъэ Iофтхьабзэхэр рагъэ­кIокIыгъэх, ау мыщ фэдэ шIыкIэр къэралыгъом щыпсэурэ цIыфхэм апэблагъэ хъугъэ. Ветеранхэр яунэ исхэу агъэшIонхэр агу зэрэрихьыгъэр процент 69-мэ къаIуагъ. «Окна Победы», «Свет Победы», «Флаги Победы», нэмыкI акциехэри тапэ­кIэ рагъэкIокIынхэу къыкIэлъэIугъэри бэ.

Гъонэжьыкъо Сэтэнай.